ԵՐԵՎԱՆ, 21 հունիսի – Sputnik. Շիրակի մարզի Անի համայնքի մի խումբ բնակիչներ հունիսի 21-ի առավոտյան փակել են Գյումրի-Երևան մայրուղին: Նրանք պահանջում էին համայնքի ՀՀԿ-ական ղեկավար Արտակ Գևորգյանի հրաժարականը և ՏԻՄ արտահերթ ընտրություններ անցկացնել։
Բողոքի ցույցի ժամանակ բնակիչները վիճեցին Երևանից Գյումրի երթևեկող մեքենաների վարորդների հետ, ինչից հետո որոշեցին բացել ճանապարհը՝ պայմանով, որ ի վերջո իրենց հարցը դրական լուծում կստանա, այլապես վաղը կրկին կփակեն ճանապարհը:
«Ճամփեն փակել ենք ու էլի պիտի փակենք, հերիք եղավ, 15 տարի խաբել ու թալանել է, պատժող չկա»,-հայտարարեց բողոքավորներից մեկը:
Հիշեցնենք, որ Շիրակի մարզի Անի խոշորացված համայնքի կենտրոն համարվող Մարալիկ քաղաքում տևական ժամանակ է` պահանջում են համայնքի ղեկավար Արտակ Գևորգյանի հրաժարականը։ Անի համայնքը, որի կենտրոնը Մարալիկն է, ձևավորվել է 2017-ին 17 համայնքների միավորման արդյունքում։
Արտակ Գևորգյանը 2007 և 2011 թվականներին վերընտրվել է Մարալիկի քաղաքապետ, իսկ նախորդ տարի ընտրվել է խոշորացված Անի համայնքի ղեկավար։ Գևորգյանը ՀՀԿ անդամ է։
Մարալիկցիները Նիկոլ Փաշինյանին դիմավորեցին «Արտակ, հեռացի՛ր» կոչով