ԵՐԵՎԱՆ, 21 հունիսի — Sputnik. Ազգային ժողովը Բարձրագույն դատական խորհրդի նոր անդամի պաշտոնում քննարկում է Վիգեն Քոչարյանի թեկնածությունը։
Լիլիթ Մակունցը` «Իմ քայլը» խմբակցության ղեկավարը պատգամավորներին ներկայացրեց Քոչարյանի կենսագրությունը։ Նա նշեց, որ թեկնածությունն ընտրվել է դատական համակարգում ապագա դատավորի պատրաստակամությունը հաշվի առնելով։
«Հաշվի են առնվել նաև չափանիշներն՝ արդյոք տվյալ թեկնածուն հակված է դատաիրավական բարեփոխումներին նպաստելուն։ Այս հանգամանքներով պայմանավորված՝ առանձնացրել ենք թեկնածուներին, որոնց հետ նախապես որևէ պայմանավորվածություն ձեռք չի բերվել, դա է պատճառը, որ նրանք տեղյակ չեն լինում իրականում, որ մենք նկատի ենք ունեցել նրանց թեկնածությունը։ Չափազանց կարևոր է անաչառության սկզբունքը», - ասաց Մակունցը։
Լրագրողների հետ զրույցում Քոչարյանը նշեց, որ երբեք ինչ–որ կուսակցության անդամ չի եղել։
Վիգեն Քոչարյանը 2006թ–ից մինչև օրս Երևանի պետական համալսարանի եվրոպական և միջազգային իրավունքի ամբիոնի վարիչ է։ 2015 թ–ից արդարադատության փոխնախարար է, համակարգում է միջազգային իրավունքի շրջանակում համագործակցությունը։
Նա լրագրողների հետ զրույցում չմեկնաբանեց ՍԴ նոր անդամ Վահե Գրիգորյանի սկանդալային հայտարարությունը` դա անտեղի համարելով։
Հունիսի 20–ին Հայաստանի խորհրդարանն ընտրել է ԲԴԽ ևս մեկ անդամի` Գրիգոր Բեքմեզյանին։
Ավելի վաղ հրաժարական էին տվել ԲԴԽ չորս դատավորները` Գագիկ Հարությունյանը (նախագահ), Արմեն Խաչատրյանը, Գևորգ Դանիելյանը և Սերգեյ Մեղրյանը։