Ինչքան շատ զորավարժություններ անեն՝ այնքան բանակն ավելի ուժեղ ու պատրաստված կլինի: Sputnik Արմենիային ասել է ռազմական վերլուծաբան Լեոնիդ Ներսիսյանը:
Ըստ Ներսիսյանի՝ Հայաստանն էլ այս պահին զորավարժություններ է անցկացնում. ինչքան ավելի մասշտաբային, ինչքան ավելի հաճախակի լինեն զորավարժությունները, այնքան բանակն ավելի պատրաստ կլինի ռազմական գործողությունների:
«Ադրբեջանի բանակը բավական շատ է անում զորավարժություն, շատ է ուղարկում սպաներին սովորելու Թուրքիայում, ՆԱՏՕ-ի անդամ մյուս երկրներում և Ռուսաստանում, բայց եթե նայենք միջազգային փորձագետների կարծիքին՝ Ադրբեջանի բանակի պատրաստվածությունը որոշ պարագայում Հայաստանինից ցածր է»,- ասել է Ներսիսյանը:
Ռազմական փորձագետի խոսքով՝ օրինակ, ոչ պայմանագրային զինծառայողների պատրաստվածության մակարդակը Հայաստանում ավելի բարձր է և դա ցույց տվեց նաև ապրիլյան պատերազմը:
Ներսիսյանը նշում է, որ ինչքան ուժեղանում է ադրբեջանական բանակը, այնքան ուժեղանում է պատերազմի վտանգը: Հայկական բանակն էլ պետք է լիարժեք և լավ պատրաստվի, որպեսզի թշնամին դա հասկանա և ռիսկ չանի պատերազմ սկսել:
Հիշեցնենք, որ ՀՀ զինված ուժերում և Արցախի Հանրապետության պաշտպանության բանակում շարունակվում են ՀՕՊ ստորաբաժանումների ներգրավմամբ մարտական հրաձգությամբ զորավարժությունները:
Հիշեցնենք նաև, որ Ադրբեջանում կրկին զորավարժություններ են: Այս անգամ իրենց մարտական պատրաստությունն են ցուցադրում մի քանի ստորաբաժանումներ, որոնք միմյանց լրացնելով ռազմական առաջադրանքն են կատարում: