ԵՐԵՎԱՆ, 20 հունիսի – Sputnik. Մեր տեղեկություններով` երեկ՝ հունիսի 19-ին, շտապօգնության մեքենայով «Էրեբունի» բժշկական կենտրոն է տեղափոխվել մի քանի տեղից դանակահարված 19-ամյա երիտասարդ։ Վնասվածքները եղել են կրծքավանդակին ու ձեռքին։
Շտապօգնության մեքենան նրան հիվանդանոց է հասցրել Ֆրունզեի փողոցից, որը գտնվում է Շենգավիթում։
Sputnik Արմենիայի տեղեկություններով՝ երիտասարդը սովորում է Հայ-հունական քոլեջում։ Ըստ ուսումնական հաստատությունում պտտվող լուրերի՝ տղային դանակահարել է նրա աղջիկ համակուրսեցու եղբոր ընկերը, որն անչափահաս է՝ 15 տարեկան։ Ըստ այդ խոսակցությունների՝ դանակահարված տղան սիրում է այդ աղջկան և հետը կապ է պահում, ինչը դուր չի եկել աղջկա անչափահաս եղբորը։
Վերջինս ընկերոջ հետ հանդիպել է երիտասարդին։ Պարզաբանումների ընթացքում էլ երիտասարդը դանակահարվել է։
Մեր տեղեկություններով՝ Շենգավիթի ոստիկանները ժամերի ընթացքում հայտնաբերել են անչափահասներին։