ԵՐԵՎԱՆ, 20 հունիսի — Sputnik. Բելառուսական «Բելավիա» ավիաընկերությունն ավելացրել է Երևան–Մինսկ կանոնավոր չվերթերի թիվը։ Այս մասին լրագրողների հետ զրույցում ասաց Հայաստանում Բելառուսի արտակարգ և լիազոր դեսպան Իգոր Նազարուկը։
«Շաբաթական մենք երկու չվերթ ունեինք, ավելացրեցինք ևս մեկը։ Դա թույլ կտա ավելացնել միջպետական ուղևորահոսքը Մինսկի և Երևանի միջև», – ասաց Նազարուկը։
Նա ընդգծեց, որ երրորդ չվերթը գործարկվել է մայիսի 7-ից։ «Բելավիան» այս չվացուցակով կաշխատի կես տարի, այնուհետև դարձյալ կվերանայի ավիաչվերթերի հաճախականությունը։ Ինքնաթիռները Երևանից Մինսկ են մեկնում շաբաթական երեք անգամ` երկուշաբթի, հինգշաբթի և շաբաթ ժամը 03:35–ին։
«Սա Եվրասիական ինտեգրման հայեցակարգի իրականացումն է, որտեղ աշխատանքային ռեսուրսների, ծառայությունների, կապիտալի և ապրանքների ազատ տեղաշարժ է կա։ Այս ամենը լրացուցիչ հնարավորություններ է տալիս մեզ ավիաչվերթերի թիվն ավելացնելու համար», – ասաց Նազարուկը։
Նա ընդգծեց, որ Հայաստանում տեսնելու, իսկ Բելառուսում հայ հյուրերին առաջարկելու շատ բան կա։ Երկրներն ապրանքների և ծառայությունների հարցում փոխլրացնում են միմյանց։
Եթե Մինսկում զարգացած է օրգանների փոխպատվաստման բժշկությունը, վնասվածքաբանությունը, ապա Երևանում` ատամնաբուժությունն ու կոսմետոլոգիական միջամտությունները։
Դեսպանի խոսքով` կարևոր է, երբ մարդը կարողանում է հարմար պայմաններում տեղ հասնել և բարձրակարգ օգնություն կամ խորհրդատվություն ստանալ։