Sputnik Արմենիան բազմաթիվ քաղաքացիներից ահազանգեր է ստանում այն մասին, որ Երևանի տարբեր փողոցներում մաշվել են հոծ գծերն ու անցումների համար նախատեսված գծանշումները, ինչը անհարմարություններ է հարուցում վարորդների համար: Հարցի վերաբերյալ պարզաբանումներ է ներկայացնում Ճանապարհային ոստիկանության օպերատիվ կառավարման կենտրոնի պետ, ոստիկանության փոխգնդապետ Արկադի Ավագյանը:
«Ամեն տարի գծանշումները թարմացվում են, այս պահին էլ կատարվում են, պարզապես հիմա Երևանի որոշ փողոցներում տեղի են ունենում ճանապարհաշինարարական, ասֆալտապատման ու ճաքալցման աշխատանքներ: Մենք չենք կարող հիմա այդ փողոցներում գծանշումներ անել, չենք ցանկանում կրկնակի աշխատանք կատարել: Պարզապես Քաղաքապետարանի կողմից հայտարարված տենդերները մի փոքր ուշացել են: Քաղաքապետարանից մեզ պարբերաբար տեղեկացնում են շինարարական աշխատանքների ընթացքի մասին»,- հայտնեց Ճանապարհային ոստիկանության օպերատիվ կառավարման կենտրոնի պետ, ոստիկանության փոխգնդապետ Արկադի Ավագյանը:
Նա տեղեկացրեց, որ երբ այդ փողոցներում ավարտվեն ճանապարհաշինարարական աշխատանքները, գծանշումները կթարմացվեն: Արկադի Ավագյանը անհարմարության համար քաղաքացիներին խնդրում է ներողամիտ լինել: