ԵՐԵՎԱՆ, 16 հունիսի — Sputnik. Չգիտես ոնց` «Սանիթեքի» «գարաժը», գրասենյակները, գտնվում են նախկին քաղաքապետի տեղակալի հոր տարածքում. խոսքը Վահե Նիկոյանի մասին է։ Այս մասին «Քաղաքացիական պայմանագիր» կուսակցության 5-րդ համաժողովի ընթացքում լրագրողների հետ ճեպազրույցի ժամանակ ասաց Երևանի քաղաքապետ Հայկ Մարությանը։
«Ես չգիտեմ` ինչպես է այդպես ստացվել ու չգիտեմ էլ` այդ տարածքը Վահե Նիկոյանի՞նն է, թե՞ իր հայրիկինը, սակայն նրանք վարձակալությամբ են տալիս այդ տարածքը «Սանիթեք» ընկերությանը։ Կամաց–կամաց պարզ է դառնում` ինչպես է ստացվել, որ մեկ ընկերություն է զբաղվում աղբահանությամբ»,–ասաց նա։
Մարությանն աղբահանության հարցը համարում է դանդաղ ռումբ։
Քաղաքապետի համար պարզ չէ, թե ինչու է «Սանիթեքը» գնում քանդման, քանի որ, օրինակ, ընկերությունը 150-200 000 դոլարանոց մեքենաներ ուներ, որոնց վրա երբևէ որևէ ներդրում չի արել, ու հիմա դրանք ուղղակի քանդվել են։
Հայկ Մարությանը խոսեց աղբահանության խնդրից. կլուծարե՞ն պայմանագիրը «Սանիթեքի» հետ
Հիշեցնենք, որ Վահե Նիկոյանը փոխքաղաքապետ է նշանակվել 2012–ի հունվարին։ 2018թ.–ին Հայկ Մարությանը առաջարկել էր նրան իր խորհրդականի պաշտոնը ստանձնել, սակայն Նիկոյանը հրաժարվել էր: