ԵՐԵՎԱՆ, 13 հունիսի — Sputnik. Հայկական անօդաչուներն էլ են թռչում առաջնագծի ողջ երկայնքով։ Այս մասին այսօր լրագրողների հետ զրույցում ասաց ՀՀ պաշտպանության նախարար Դավիթ Տոնոյանը։
Ինչպես արդեն հայտնել էինք, երեկ Արցախի ՊԲ–ն հայտարարել էր, որ առաջնագծի ողջ երկայնքով նկատվում է ադրբեջանական դրոնների թռիչքների աճ։
«Մեր անօդաչուներն էլ են թռչում առաջնագծի երկայնքով։ Մեր կողմից էլ կան հատուկ ջոկատայինների կուտակումներ։ Մենք այժմ վերլուծում ենք հակառակորդի զորավարժությունները»,–ասաց նա։
Հարցին, թե պատերազմի իրական վտա՞նգ կա` Տոնոյանը պատասխանեց, որ եթե լինի նման սպառնալիք, կտեղեկացվի այդ մասին։
Նախարարի խոսքով` երեկվա ու այսօրվա զեկույցներով` համեմատաբար կայուն վիճակ է առաջնագծում։
Հիշեցնենք, որ երեկ տարածած Արցախի ՊԲ–ի հաղորդագրության համաձայն` առաջնային գծի ողջ երկայնքով նկատվում է ադրբեջանական անօդաչու թռչող սարքերի և ռազմական ավիացիայի ուսումնական թռիչքների աճ, որոնք հաճախ խախտում են սահմանված թռիչքային գոտին: