ԵՐԵՎԱՆ, 12 հունիսի — Sputnik. Երևանի ավագանու «Լույս» խմբակցության ղեկավար Դավիթ Խաժակյանի հարազատին օրեր առաջ Երևանում հարբած ոստիկանների կողմից ծեծի ենթարկելու դեպքով երկու ոստիկանի մեղադրանք է առաջադրվել։ Այս մասին Sputnik Արմենիայի հետ զրույցում ասաց Հատուկ քննչական ծառայության մամուլի քարտուղար Մարինա Օհանջանյանը։
Ինչպես արդեն հայտնել էինք Խաժակյանը ոստիկանություն դիմում էր ներկայացրել` ասելով, որ իր հարազատին հարբած ոստիկանները ծեծել են` կոտրելով նրա քիթը։
«Երկու ոստիկան է ձերբակալվել, որոնցից մեկն արդեն կալանավորվել է։ Նրանց մեղադրանքներ են առաջադրվել ՀՀ Քրեական օրենսգրքի երեք հոդվածներով՝ խոշտանգման, պաշտոնեական կեղծիք կատարելու և պաշտոնեական լիազորությունները չարաշահելու համար»,–ասաց Օհանջանյանը։
Հիշեցնենք, որ Խաժակյանը հայտնել էր, որ երբ իր բարեկամը կողպելիս է եղել իր վարձակալած տարածքի դուռը, մոտեցել են երկու հարբած սևազգեստ անձինք և հարցրել, թե ո՞վ է, ի՞նչ է անում այս տարածքում նա։ Մերձավորը նշել է, որ տարածքի տերն է ու հարցրել, թե ովքե՞ր են այդ տղամարդիկ։ Ի պատասխան նրանք նշել են, որ ոստիկաններ են ու ցույց են տվել իրենց վկայականները։ Հետո, ըստ Խաժակյանի, այդ մարդիկ, հարվածելով և քաշքշելով, նրա ազգականին նստեցրել են մեքենայի մեջ և բաժին տարել։