ԵՐԵՎԱՆ, 8 հունիսի – Sputnik. Ռուսաստանի նախագահի հետ հանդիպման արդյունքներով ՀՀ վարչապետի արված հայտարարությունը կարող է ենթադրել նոր Սու-30 ինքնաթիռների մատակարարում: Sputnik Արմենիային աայս մասին ասաց ռազմական փորձագետ Դավիթ Հարությունովը:
Հունիսի 7-ին Վլադիմիր Պուտինի հետ հանդիպումից հետո Նիկոլ Փաշինյանը, պատասխանելով այն հարցին, թե արդյոք անդրադարձ եղել է «Իսկանդերների» մատակարարման թեմային, ասաց, որ Հայաստանում դրանց թիվը բավարար է, «բայց հույս ունենք էլի ինչ–որ բան ստանալ»:
Կանխատեսումներ անելը անշնորհակալ գործ է, բայց, Հարությունովի խոսքով, կարելի է հետևել միտումներին:
«Փաշինյանի հայտարարությունը կարող է վերաբերել Սու-30-երին, քանի որ դրանց մասով պայմանագիրը բավականին երկարաժամկետ ու ծավալուն է: Ենթադրվում է, որ Հայաստանը 4 ինքնաթիռով չի սահմանափակվի», – ասաց Հարությունովը:
Սու-30-ի գործարքը, կարծես թե, ամենախոշորներից է հայկական Զինված ուժերի պատմության մեջ:
Երևանը, ըստ նրա, փոխում է ռազմական գնումների ոլորտում իր ռազմավարությունը: Եթե նախկինում շեշտը դրվում էր ՀՕՊ-ի և առաջնագծի վրա, ապա այժմ այն տեղափոխվում է ՌՕՈւ–ի զարգացման կողմ:
Կարելի է ենթադրել, որ միտումը կշարունակվի և ինչ–որ ձևով կանդրադառնա նաև ուղղաթիռային պարկին: Խոսքը կարող է լինել կա՛մ առկա տեխնիկայի արդիականացման մասին, կա՛մ շարժակազմի նորացման:
«Եթե ուղղաթիռները չարդիականացվեն, դրանք անհրաժեշտ կլինի փոխել: Թեև առաջինն ավելի էժան է, բայց արդիականացման հնարավորությունները սահմանափակ են: Օրինակ` Ադրբեջանում հարվածային ուղղաթիռների հիմնական մասն արդիականացված Մի-24-երն են», – ասաց Հարությունովը:
Մյուս կողմից` նոր ուղղաթիռները էժան հաճույք չեն: Ռուսական կողմն ընդհանրապես երկու հիմնական տարբերակ է առաջարկում` Մի-28 և Կա-52 տարբեր մոդիֆիկացիաներով:
Սակայն այս ամենը դեռ ենթադրությունների հարթության վրա է: Այդ առումով նաև կադրեր են անհրաժեշտ, ինչպես նաև օդաչուների և սպասարկող անձնակազմի վերապատրաստում:
«Չի բացառվում ցամաքային սպառազինությունը, ավելի մոբիլ խմբերի համար նախատեսված զենք, հրետանու զարգացում», – ասաց Հարությունովը:
Ավելի վաղ հայտնի էր դարձել, որ Հայաստանն արդեն մասամբ վճարել է ռուսական 4 Սու-30 կործանիչների մատակարարման պայմանագրով նախատեսված գումարը: