ԵՐԵՎԱՆ, 8 հունիսի — Sputnik. ՀՀ մշակույթի նախարարի նախկին պաշտոնակատար ու նախկին փոխնախարար Նազենի Ղարիբյանի համար իր պաշտոնանկությունն անակնկալ չէր։ Այս մասին նա ասաց Sputnik Արմենիայի հետ զրույցում` հավելելով, որ իր շուրջ տիրող աղմուկից ինքն արդեն ենթադրել էր, թե ինչպիսին կլինի հանգուցալուծումը։
Այդուհանդերձ, իր հեռացումը գործադիր իշխանությունից հիմնավոր չի համարում և վստահ է, որ դա իր դեմ «ուղղորդված արշավի հետևանք էր»։
«Գտնում եմ, որ իմ հեռացումը հիմնավորված չէ, եթե դա պայմանավորված չէ այն հանգամանքով, որ ես ինչ–որ տեղ չեմ կատարել իմ աշխատանքը կամ թերացել եմ նախարարության խնդիրներում։ Ես գտնում եմ, որ հակառակը` նախարարի պարտականությունները ստանձնելիս ես նախարարությունն ընդունել եմ բավական քաոսային վիճակում»,– ասաց նա։
Ղարիբյանը նշեց, որ իր նշանակումից հետո նախարարության աշխատակիցները բողոքի ակցիաներ էին անում, հրաժարվում էին աշխատել, աշխատանքային ժամին հավաքվում, նամակներ էին գրում վերադաս մարմիններին։
«Ես հսկայական ջանք եմ ներդրել`և՛ անձնական, և՛ մարդկային, և՛ դիվանագիտական, որպեսզի կարողանամ իրենց հետ բերել աշխատանքային հուն։ Բացի այդ, ես երկու պաշտոն եմ վարել` փաստացի, մնալով փոխնախարար, վերցրել եմ ինձ վրա նախարարի պարտականությունները` ունենալով ամբողջ պարտականությունները, բայց չունենալով այն ամբողջ լիազորությունները, որ ունի նախարարը»,– ասաց նա։
Ղարիբյանը նշեց, որ գիտի, թե ով կամ ովքեր են իրականացրել իր դեմ արշավը, բայց չցանկացավ անուններ տալ։
«Միամիտ է այն մարդը, որ կմտածի, թե ես չեմ իմացել,– ասաց նա,- ժամանակը կգա, և այդ անձն ու ամբողջ խումբը կբացահայտեն իրենք իրենց։ Ինձ համար սա անձի խնդիր չէ։ Ես պարզապես ցանկանում եմ բարձրաձայնել, որ կա այսպիսի երևույթ»։
Եթե կինը երջանիկ չէ, նա չի կարող երջանկացնել ամուսնուն ու զավակներին. Նազենի Ղարիբյան
Ինչ վերաբերում է հետագա ծրագրերին, Ղարիբյանը հայտնեց, որ նախ մտադիր է հանգստանալ լարված տարվանից հետո, ապա վերադառնալ գիտական աշխատանքին։
Բայց գիտականից զատ մտադիր է զբաղվել նաև մշակույթի ասպարեզում ակտիվ քաղաքացիական գործունեությամբ` որպես տեսաբան նպաստելով մշակութային հեղափոխության իրականացմանը։
Հիշեցնենք` 2018 թվականի մայիսի 29-ին Նազենի Ղարիբյանը նշանակվել էր ՀՀ մշակույթի նախարարի տեղակալ: 2019 թվականի հունվարի 14-ին ՀՀ մշակույթի նախարարի պարտականությունները ժամանակավորապես դրվել էին մշակույթի նախարարի տեղակալ Նազենի Ղարիբյանի վրա։ Իսկ 2019թ–ի մայիսի 30-ին նա ՀՀ վարչապետ Նիկոլ Փաշինյանը հրամանով պաշտոնանկ էր արվել փոխնախարարի պաշտոնից։