Փառատոնի կազմակերպիչներն ու մասնագետները հանգստացնում են այն մարդկանց, ովքեր ոչխարի խուզը համարում են դաժանություն կենդանու նկատմամբ. դա պարտադիր պրոցես է, առանց խուզի հնարավոր չէ։
«Ճիշտ է` մեր երկիրն այսօր բրդի բարձր պահանջարկ չունի, բայց ոչխարի բուրդը պարտադիր պետք է խուզել. նախ, որ պարազիտներից խուսափեն և որ սար` կենդանիները թեթև բարձրանան»,– ասել է «Ոչխարների խուզման փառատոնի» ժյուրիի անդամ Հովիկ Ավագյանը։
Ժյուրիի անդամը հպարտությամբ հիշել է, որ նախորդ տարի փառատոնին հրավիրված եվրոպացի մասնագետը ոչխարի խուզման միջին ցուցանիշ է արձանագրել, իսկ մեր սյունեցի տղան ռեկորդ է սահմանել` 2 րոպե 30 վայրկյանում ձեռքով կենդանուն ազատել է բրդից` առանց մաշկը վնասելու։ Այս գործում դա համարվում է սենսացիոն արդյունք։
Այս տարվա արդյուքնները պարզ կլինեն հունիսի 8–ին։
Հիշեցնենք`արդեն ավանդական դարձած «Ոչխարների խուզման փառատոնը» կկայանա հունիսի 8-ին՝ շաբաթ օրը, Սյունիքի մարզի, Տաթև համայնքի Խոտ բնակավայրում: Այս տարի նույնպես կանցկացվի խուզի մրցույթ, ցուցահանդես-տոնավաճառ, համերգային ծրագիր, իսկ արտերկրից ժամանած վարպետը կցուցադրի ոչխարների խուզման իրենց ավանդական մոտեցումները: Վերջում ժյուրին կընտրի լավագույնին։