ԵՐԵՎԱՆ, 7 հունիսի — Sputnik. Հայաստանում հասարակական սննդի օբյեկտների համար հարկերը չեն բարձրանա այնքան, որքան նախատեսվում էր նախկինում։ Այսօր ԱԺ–ում այս մասին ասաց ֆինանսների փոխնախարար Արման Պողոսյանը` ներկայացնելով Հարկային օրենսգրքում փոփոխություններ կատարելու նախագիծը։
Այժմ ռեստորաններն ու սրճարանները (բացառությամբ 600 քմ–ից ավելի մակերես ունեցող ռեստորանները) ֆիքսված տուրք են վճարում, կախված հաստատության գտնվելու վայրից և քառակուսի մետրից (Երևանի կենտրոնական և այլ գոտիները, մարզերի քաղաքները, այլ բնակավայրեր)։ Այժմ նրանց հարկն ուզում են շրջանառությանը համաչափ դարձնել։
2018 թվականին նրանց առաջարկել էին 6% եկամտահարկ վճարել։ Դրանից թույլատրվում էր նվազեցնել ծախսերի 4%–ը, սակայն միայն այն դեպքում, եթե այդ ծախսերը (մթերքների գնում, կոմունալ ծառայություններ և այլն) հաստատված են փաստաթղթերով։ 2019 և 2020 թվականին առավելագույն հարկն ուզում էին բարձրացնել համապատասխանաբար մինչև 8 և 10%։
Այժմ որոշել են հարկերը չբարձրացնել. իրականում այս հարկի բեռը կկազմի մոտ 4,5%, ավելացրեց փոխնախարարը։
Նշենք, որ ավելի վաղ հարկերը բարձրացնելու դեմ ռեստորաններում և սրճարաններում բողոքի լայնածավալ ակցիաներ են անցկացվել։