ԵՐԵՎԱՆ, 7 հունիսի — Sputnik. «Հարավկովկասյան երկաթուղին» (ՀԿԵ) անդրադարձել է վերջին շրջանում մամուլում հնչող քննադատություններին։
Ընկերության տարածած հաղորդագրության համաձայն` այդ արշավն իրենց դեմ սկսել են նախկին գործընկերները, որոնց ծառայություններից ՀԿԵ–ն հրաժարվել է, մասնավորապես` «Լիոն Պրինտինգ Սերվիս» և «Շին Արտս» ՍՊԸ-ները։
ՀԿԵ–ն բացատրում է, որ այդ ընկերությունների մատակարարումներից հրաժարվել է, քանի որ դրանք պարտվել են հայտարարված գնումների մրցույթներում` ավելի ցածր գին և ավելի բարձր որակ առաջարկող մրցակիցներին։
«Արդյունքում երկաթուղին սկսել է տնտեսել էական ֆինանսական միջոցներ, որոնք փոխանցվում են ռազմավարական ուղղությունների զարգացման ֆինանսավորմանը»,– նշում է ՀԿԵ–ն` միաժամանակ հայտարարելով, որ երկաթուղին չի պատրաստվում հրաժարվել ընկերության ֆինանսական արդյունավետության մակարդակի բարձրացման քաղաքականությունից և շարունակելու է գնումներ կատարել մրցութային ընթացակարգերի հիման վրա:
Նշենք, որ «Լիոն Պրինտինգ Սերվիս» ընկերությունը գունավոր տպագրության, իսկ «Շին Արտս» ՍՊԸ-ն շինարարության ոլորտում աշխատող ընկերություն է։
«ՀԿԵ» ՓԲԸ-ն «Ռուսական երկաթուղիներ» ԲԲԸ-ի դուստր ընկերությունն է և իրականացնում է Հայաստանի երկաթուղային համակարգի կոնցեսիոն կառավարումը: Համաձայն 2008 թ. փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը 30 տարի է՝ կողմերի փոխադարձ համաձայնությամբ ևս 10 տարի երկարացման իրավունքով: