Ըստ Փաշինյանի, մինչև այդ Արցախի իշխանությունները տեղյակ էլ չեն եղել, թե Հայաստանի նախագահն ինչ հարցերի շուրջ է բանակցում Ադրբեջանի պաշտոնակցի հետ: Քաղաքագետ Սուրեն Սուրենյանցը Sputnik Արմենիայի հետ զրույցում միանգամայն տրամաբանական է համարում Փաշինյանի հայտարարությունը։
«Արցախի իշխանությունների՝ Ղարաբաղյան բանակցություններից անտեղյակ լինելու մասին Փաշինյանի հայտարարությունը չի կարող հիմքեր չունենալ»,-ասում է Սուրենյանցը։
Քաղաքագետին մտահոգում է, այն, որ Փաշինյանի հայտարարությամբ բացահայտվում է, որ Ստեփանակերտի ու Երևանի միջև իսկապես կա հարաբերությունների ճգնաժամ։
«Եթե Փաշինյանն ասում է, որ Արցախի իշխանության ներկայացուցիչների հետ մի սեղանի շուրջ հարցեր են քննարկվել, ու դրանից հետո հրապարակային այլ քննարկումներ են լինում, դա նշանակում է, որ Ստեփանակերտի ու Երևանի միջև այս պահին կա շատ լուրջ ինստիտուցիոնալ ճգնաժամ, ինչն ունի օբյեկտիվ ու սուբյեկտիվ պատճառներ»,-կարծում է Սուրենյանցը։
Նրա խոսքով` Հայաստանում տեղի ունեցած հեղափոխական զարգացումներից հետո Արցախի իշխանությունները պետք է ադապտացվեին այն նոր իրողություններին, որոնք ձևավորվել են Հայաստանում, սակայն ադապտացիան այնքան էլ հարթ չի ընթանում։
«Դրանում, իհարկե, մեղքի որոշակի բաժին ունի Հայաստանի իշխանությունը, որն ամեն դեպքում պետք է ձեռնպահ մնա Արցախի իշխանության նկատմամբ տոտալ վերահսկողության սահմանելու ձգտումներից»,-նշում է Սուրեն Սուրենյանցը։
Քաղաքագետը համոզված է, որ և Հայաստանի և Արցախի իշխանության վերնախավում այնպիսի մարդիկ են, որոնք որևէ կերպ չեն ցանկան վնասել Հայաստանի ու Արցախի ինչպես ներպետական, այնպես էլ համընդհանուր շահերը։