ԵՐԵՎԱՆ, 6 հունիսի — Sputnik. Փարիզի պատկերասրահներից մեկում ցուցադրվել են հայտնի լուսանկարիչ Արա Գյուլերի աշխատանքները։ Այս մասին հայտնում է Figaro թերթը` նշելով, որ Գյուլերը Թուրքիայի լուսանկարչական արվեստի լեգենդն է։
Նա ծնվել է 1928 թվականին։ Լուսանկարչական արվեստով սկսել է զբաղվել 1950-ականների սկզբին։ Հոր իրական ազգանունը Տերտերյան էր։ Նա Տերտերյանը դարձրեց Գյուլեր, որպեսզի թուրք հասարակության մեջ հեշտ լինի ինտեգրվել։
Ֆրանսիական պարբերականները գրում են` Արա Գյուլերն իր արվեստում միավորում էր տարբեր մշակույթները, պահպանում սուր ընկալումն այն բարդ աշխարհի, որում ապրում էր։ 22 տարի նա Yeni Istanbul թերթի ֆոտոթղթակիցն էր, հետագայում դարձավ Time ամսագրի մերձարևելյան առաջին թղթակիցը, երբ պարբերականը 1958 թվականին սկսեց աշխատել Թուրքիայում։
«Գյուլերին որոշ չափով նման է ժամանակակից նկարիչ Սարգիս Զաբունյանը։ Նա ծնվել է 1938 թվականին Թուրքիայում, իսկ 1964 թվականից ապրում է Փարիզում։ 2015 թվականին նա Թուրքիան ներկայացրեց Վենետիկի բիենալեում»,– գրում է թերթը։
Գյուլերը բազմաթիվ հեղինակավոր մրցանակների դափնեկիր է, լուսանկարչական սարքեր արտադրող գերմանական Leica ընկերությունը նրան նաև «Վարպետ» տիտղոսն է շնորհել։ 2000 թվականին ստացել է Ֆրանսիայի պետական բարձրագույն մրցանակը` Պատվավոր լեգեոնի շքանշանը։ Լեգենդար լուսանկարիչը մահացել է 2018 թվականի հոկտեմբերին 90 տարեկանում։