ԵՐԵՎԱՆ, 5 հունիսի — Sputnik. Մարտի 1-ի գործով պաշտոնյայի ձերբակալությունը վկայում է ՀՔԾ հետևողական աշխատանքի մասին: Այսօր ԱԺ-ում, լրագրողների հետ ճեպազրույցում ասաց ՀՀ վարչապետ Նիկոլ Փաշինյանը:
«Վերջին 10 տարիներին ոչ թե քննություն է իրականացվել, այլ ամեն ինչ արվել է, որպեսզի բոլոր հնարավոր փաստերը կոծկվեն: Եվ այն փաստը, որ պարկուճները փոխված են, նշանակում է ամեն ինչ է փոխվել` մարդիկ, դեպքերը, դեմքերը: Եվ այս պայմաններում, եթե ՀՔԾ-ն կարողացել է հասնել նրան, որ կոնկրետ մարդ ձերբակալվի... ես այդ լուրն իմանալուց հետո, բնականաբար, նաև շատ էմոցիոնալ պահեր եմ ապրել: Բայց հիմա չեմ ուզում շատ բան ասել, քանի որ խոսքը դեռ ձերբակալության մասին է, դեռ չգիտենք` մեղադրանք կառաջադրվի, չի առաջադրվի, ինչպես կընթանա»- ասաց Փաշինյանը:
Վարչապետը, սակայն, ընդգծեց, որ Մարտի 1-ը պետք է բացահայտվի: Անդրադառնալով Քոչարյանի ու 3 նախկին պաշտոնյաներին Մարտի 1-ի գործի շրջանակներում առաջադրված մեղադրանքներին` Փաշինյանը նշեց, որ չի ցանկանում ու չի կարող իրավական գնահատական տալ, դա կանի դատական համակարգը:
Հիշեցնենք, որ երեկ` հունիսի 4–ին ՀՔԾ–ն հայտարարություն տարածեց, համաձայն որի 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործի շրջանակներում հանցանք կատարելու` հրազենի գործադրմամբ Զաքար Հովհաննիսյանին դիտավորությամբ կյանքից զրկելու կասկածանքով ձերբակալվել է 2008 թվականի մարտի 1-ի դրությամբ ՀՀ ոստիկանության զորքերի հրամանատարի տեղակալի, նույն ինքը` շտաբի պետի պաշտոնը զբաղեցրած Գեղամ Պետրոսյանը: