ԵՐԵՎԱՆ, 5 հունիսի — Sputnik. Բնական գազի օգտագործման և մատակարարման մի շարք կետեր «Գազպրոմ Արմենիան» չի պահպանել, ինչի համար էլ Հանրային ծառայությունները կարգավորող հանձնաժողովն իր այսօրվա նիստում որոշեց ընկերությանը տուգանել 10 մլն դրամով։
Հանրային ծառայությունները կարգավորող հանձնաժողովը 2019 թվականի փետրվարի 28-ից մարտի 6-ը մոնիթորինգ է իրականացրել ընկերությունում ու մի շարք խախտումներ հայտնաբերել։
«9 դեպքում չեն պահպանվել գազամատակարարման ցանցի միացման կանոնները, նոր միացման գործընթացի վերաբերյալ տեղեկատվության մեջ չեն ներառվել առանձնատների, 3 դեպքում` 100 խմ և ավելի ժամային սպառում ունեցող սպառողների, 2 դեպքում` նախկինում դիմած և 2019–ի առաջին եռամսյակի վերջի դրությամբ գազամատակարարման ցանցին չմիացված բաժանորդների մասին տեղեկատվությունը և այլն»,–հայտնեցին նիստի ժամանակ։
Այս և այլ մի շարք խախտումների համար ընկերությունը տուգանվեց 10 մլն դրամով։