ԵՐԵՎԱՆ, 4 հունիսի – Sputnik. Շիրակի մարզպետ Տիգրան Պետրոսյանը ոստիկանության Շիրակի մարզային վարչության պետի տեղակալ Աշոտ Գրիգորյանի հետ երեկ` հունիսի 3–ին, այցելել է Շիրակի օդանավակայան, հանդիպել օդանավակայանի տնօրինության հետ: Հանդիպման ընթացքում քննարկվել են ինչպես օդանավակայանի գործունեությանը, ուղևորահոսքերին առնչվող հարցեր, այնպես էլ կարգապահական և տեղեկատվական խնդիրները: Sputnik Արմենիային այս մասին հայտնեցին մարզպետարանից։
«Շիրակ օդանավակայանն այն կարևոր հանգույցն է, որի լիարժեք աշխատանքը ռազմավարական նշանակություն ունի ոչ միայն մեր մարզի, այլ մեր երկրի համար։ Նշանակում է, որ բոլոր կառույցներն ու շահագրգիռ կողմերը պետք է համագործակցեն ու աշխատեն, որպեսզի զերծ մնանք տարատեսակ խնդիրներից ու դժգոհություններից, ցանկացած մեկի համար պետք է անընդունելի լինի թալանի հոգեբանությունով աշխատող տաքսիստն ու զբոսաշրջիկին հիասթափեցնող վերաբերմունքը»,- նշել է Տիգրան Պետրոսյանը:
Կարևորելով մարզ այցելող զբոսաշրջիկների պատշաճ դիմավորումն ու սպասարկումը՝ մարզպետն ու Աշոտ Գրիգորյանը զրուցել են տարածքում տաքսի ծառայություն մատուցող վարորդների հետ՝ հորդորելով զերծ մնալ ոչ պատշաճ վերաբերմունքից:
Մարզպետը «Շիրակ» օդանավակայանում զրուցել է Մոսկվա-Գյումրի չվերթով Գյումրի ժամանած զբոսաշրջիկների հետ, իսկ Նիժնի Նովգորոդից Գյումրի եկած Գոնչարով ամուսիններին անձամբ է ուղեկցել: Հյուրերին մարզպետը պատմել է Գյումրու պատմության, ճարտարապետության, ավանդույթների ու սովորույթների մասին:
«Մենք մտածում էինք, որ տպավորված ենք գնալու ձեր քաղաքից, բայց նաև զարմացած ենք ու հիացած, եթե մեր ընկերներին պատմենք, որ մարզպետն անձամբ է ուղեկցել ու պատմել քաղաքի մասին երևի չհավատան»,– մարզպետին ասել է Կատյա Գոնչարովան:
Նա վստահ է, որ Գյումրին տուրիստական լուրջ ներուժ ունի, իսկ եթե քաղաքում ապրողներն այսքան հյուրընկալ ու բարյացակամ են, ուրեմն հաջողությունն էլ սարերի հետևում չէ։