ԵՐԵՎԱՆ, 4 հունիսի— Sputnik. ՀՀ վարչապետ Նիկոլ Փաշինյանը 10 նոր հրամանագիր է ստորագրել։ Փաստաթղթերը հրապարակվել են վարչապետի պաշտոնական կայքում։
Փաշինյանին նշանակումները վերաբերում են նախարարների տեղակալներին։
«Այսպիսով, տարածքային կառավարման և ենթակառուցվածքների նախարարի տեղակալներ են նշանակվել Լիլիա Շուշանյանը, Բագրատ Բադալյանը և Հակոբ Վարդանյանը։ Իսկ էկոնոմիկայի նախարարի տեղակալներ են նշանակվել Արտակ Քամալյանն ու Ավագ Ավանեսյանը։ Մեկ փոխնախարար էլ` Գեղամ Վարդանյանը, նշանակվել է բարձր տեխնոլոգիական արդյունաբերության նախարարությունում»,– տեղականում ենք վարչապետի կայքից։
Կրթության, գիտության, մշակույթի և սպորտի նախարարի 3 տեղակալներ են նշանակվել Արևիկ Անափիոսյանը, Գրիշա Թամրազյանը և Արա Խզմալյանը։ Իսկ շրջակա միջավայրի նախարարի տեղակալ է նշանակվել Իրինա Ղափլանյանը։
Փաշինյանը 26 պաշտոնյայի ազատել է աշխատանքից
Հիշեցնենք` կառավարության կառուցվածքի ու գործունեության մասին նոր օրենքով ՀՀ կառավարությունը կազմված է լինելու հետևյալ նախարարություններից. Արտաքին գործերի նախարարություն, Պաշտպանության նախարարություն, Արտակարգ իրավիճակների նախարարություն, Արդարադատության նախարարություն, Աշխատանքի և սոցիալական հարցերի նախարարություն, Կրթության, գիտության և մշակույթի նախարարություն, Բնապահպանության նախարարություն, Առողջապահության նախարարություն, Ֆինանսների նախարարություն, Էկոնոմիկայի նախարարություն, Տարածքային կառավարման և ենթակառուցվածքների նախարարություն, Բարձր տեխնոլոգիական արդյունաբերության նախարարություն:
Սփյուռքի նախարարության փոխարեն այսուհետ կստեղծվի Սփյուռքի գործերի գլխավոր հանձնակատարի պաշտոն վարչապետի աշխատակազմում: