ԵՐԵՎԱՆ, 4 հունիսի — Sputnik. ԶԼՄ–ները հայտնում են, որ Մոսկվայի մարզի Պուտիլկովո գյուղում 24–ամյա հատուկջոկատային Նիկիտա Բելյանկինի սպանության հետ կապ ունեցող անձանց թվում ՀՀ քաղաքացիներ են եղել։
ՌԵՆ ՏՎ–ի տվյալների համաձայն` մարդասպանը գարեջրատան սեփականատեր է։ Ըստ РБК–ի` գլխավոր կասկածյալը Գրիգոր Օհանյանն է։
Մահացածի հայրը` Ալեքսեյ Բելյանկինը, РБК-ի հետ զրույցում տեղեկացրել է, որ բոլոր կասկածյալների ինքնությունը պարզվել է:
Տեղեկություններ կան, որ հանցագործը դեպքից հետո Հայաստան է մեկնել։
Քննության նախնական տվյալների համաձայն` հունիսի 1–ի երեկոյան Նիկիտա Բելյանկինը տեսել է, որ երկու խումբ կռվում են իրար հետ և որոշել է միջամտել։ Նիկիտան գազային ատրճանակից մի քանի նախազգուշական կրակոց է արձակել, բայց նրան հարվածել են դանակով։ Մահացու հարվածը եղել է սրտի հատվածում։
Պաշտոնական տվյալների համաձայն` ոստիկանությանը հաջողվել է գտնել ու Քննչական կոմիտե բերել սպանության ականատեսներից մեկին։ Դա Նարեկ անունով մի երիտասարդ է։ Նա ամբողջ գիշեր հարցաքննվել է ՔԿ–ում։
Արդեն հայտնի է, որ առաջին կասկածյալներին հարցաքննել են, նրանց բնակարաններում խուզարկություններ են անցկացվել։ Քննչական մարմինները առգրավել են քննության համար անհրաժեշտ իրերը։
Ի՞նչ է հայտնի հատուկջոկատայինի սպանության մեջ կասկածվող հայերի մասին
Սպանությունը մեծ իրարանցում է առաջացրել։ Ազգությունների հարցերով դաշնային ծառայության ղեկավար Իգոր Բարինովը ՌԻԱ Նովոստիի հետ զրույցում ասել է, որ Մոսկվայի մարզում հատուկջոկատայինի սպանության հետ կապված ազգամիջյան թշնամության բորբոքումն անթույլատրելի է։
«Ծանրագույն հանցագործություն է իրագործվել։ Մարդասպանները չունեն ո՛չ քաղաքացիություն, ո՛չ ազգություն։ Նրանք հանցագործներ են։ Այդ պատճառով ձերբակալվածն էլ, խուզարկության ենթարկվածն էլ պետք է քրեական պատասխանատվության ենթարկվեն», – ասել է Բարինովը։
Նշենք, որ երեկ երկանյան ավելի քան 300 մարդ ողբերգության վայր էին այցելել` Նիկիտա Բելյանկինին հարգանքի տուրք մատուցելու համար։
Մահացածին կհուղարկավորեն հունիսի 6–ին Միտինսկի գերեզմանատանը։