ԵՐԵՎԱՆ, 3 հունիսի — Sputnik. Ռուսաստանից ու Ղազախստանից դեպի Հայաստան դրամական փոխանցումների հետ կապված գլոբալ խնդիր չկա։ Այսօր ԱԺ–ում, լրագրողների հետ զրույցում այս մասին ասաց Կենտրոնական բանկի նախագահ Արթուր Ջավադյանը` մեկնաբանելով մամուլում տարածված տեղեկությունները, թե այդ երկրներից Հայաստան գումար փոխանցել չի ստացվում:
«Մենք ստուգել ենք այդ տեղեկությունը, ընդամենը կապված է իրենց բանկային համակարգի հետ։ Խնդրել ենք մեր գործընկերներին, որ եթե այդպիսի դեպքեր լինեն, անպայման մեզ տեղեկացնեն։ Ես խնդրում եմ այն քաղաքացիներին, որոնք դիմում են ձեզ, առաջին հերթին դիմեն տեղի պատկան մարմիններին, ես նկատի ունեմ այն բանկերին, որոնք փոխանցում չեն անում»,– ասաց նա` վերահաստատելով, որ Հայաստանում փող ընդունելու հետ կապված որևէ խոչընդոտ չկա։
Որպես տեղի ունեցածի բացատրություն` Ջավադյանը չբացառեց տեխնիկական խնդիրների հնարավորությունը։
Իսկ ընդհանուր առմամբ դեպի Հայաստան դրամական ներհոսքը, Ջավադյանի խոսքով, վերջին 1 տարվա ընթացքում աճել է, հիմնականում` ԵՄ երկրներից։