ԵՐԵՎԱՆ, 30 մայիսի — Sputnik. ՀՀ պաշտպանության նախարարությունը ներկայացրել է «Զինվորական ծառայության և զինծառայողի կարգավիճակի մասին» օրենքում փոփոխությունների փաթեթը։
ՀՀ Ազգային ժողովում ելույթի ընթացքում Հայաստանի պաշտպանության նախարարի տեղակալ Գաբրիել Բալայանը հաղորդեց, որ փոփոխությունները, մասնավորապես, առաջարկում են վերականգնել նախկինում գործող պայմանագրային զինվորական ծառայության ընդունվելու տարիքը՝ 36-ից դարձնելով 40 տարեկան: Հանձնաժողովում քննարկման ժամանակ լրացում է կատարվել, առաջարկվել է հազվագյուտ մասնագիտությունների գծով սահմանել 45 տարին:
Փոփոխություններն առաջարկում են նվազեցնել «Պատիվ ունեմ» ծրագրով ծառայության նվազագույն ժամկետը երեքից մինչև երկու տարի։
«Մենք ուզում ենք ավելի գրավիչ դարձնել «Պատիվ ունեմ» ծրագիրը։ Միաժամանակ կխստացնենք պայմանները (ընտրության` խմբ.)», – ասաց Բալայանը։
Օրինագծով սահմանվում է մեկ անգամ տարկետում տալ բոլոր զորակոչային տարիքի և միջին մասնագիտական հաստատություններում սովորող երիտասարդներին մինչև ուսումնառության ավարտը:
Նախագծով նախատեսվում է, որ միաժամանակ զորակոչվող հարազատ եղբայրների կողմից նույն զորամասում ծառայության նշանակվելու ցանկության դեպքում վիճակահանությանը կմասնակցի նրանցից միայն մեկը: Իսկ ծառայության մեջ գտնվող եղբայր ունեցող զորակոչիկը եղբոր ծառայության վայր կարող է նշանակվել, եթե բավարարում է տվյալ զորամասում ծառայության նշանակվելու պայմաններին։
Փոփոխությունների ևս մեկ կետի համաձայն՝ պատերազմական ժամանակ հաստիքներին կցագրված քաղաքացիների հետ հաստիքով նախատեսված պարտականությունների ներգրավման պայմանագրի ժամկետը սահմանվում է 1 տարի՝ գործող 3 ամսվա փոխարեն, խոսքն ակտիվ պահեստազորի մասին է:
Իսկ սպաների համար սահմանված մատչելի և երկարաժամկետ հիփոթեքային վարկավորման ծրագրում ընդգրկվելու հնարավորություն է ընձեռվում նաև ավագ ենթասպայական կազմի զինծառայողներին: Նախագծով հստակեցվում են նաև մարտական գործողությունների մասնակցի կարգավիճակ տալու ընթացակարգը:
Բուհերի ուսանողները, որոնք որոշել են օգտվել «Պատիվ ունեմ» ծրագրից, բանակից տարկետում կստանան բակալավրիատում ուսումը շարունակելու համար, միաժամանակ, նրանք կանցնեն զինվորական դասընթացներ։ Ուսումն ավարտելուց հետո նրանց կշնորհվի լեյտենանտի կոչում և նրանք կծառայեն երեք տարի։ Ծառայություն անցնելու ընթացքում այդ զինծառայողներն աշխատավարձ կստանան։ Ժամկետային ծառայության ավարտից հետո ուսանողները ֆինանսական օգնություն կստանան մագիստրատուրայում ուսումը շարունակելու համար։