ԵՐԵՎԱՆ, 30 մայիսի — Sputnik. ՀՀ կառավարությունն այսօր կայացած նիստում մշակույթի նախարարության առաջարկով որոշում է կայացրել պահուստային ֆոնդից 18 539 100 դրամ փոխանցել Հայաստանի նկարիչների միությանը։
Որոշման մեկնաբանություններում նշված է, որ այդ գումարն անհրաժեշտ է միության ունեցած հարկային պարտավորությունը վճարելու նպատակով:
Իսկ պարտավորություններն առաջացել են 01.09.2015թ.-01.01.2017թ.–ի ընթացքում։ Այս ժամանակահատվածում միությունը վարձակալությամբ է տվել տարածքներ, բայց դրանց վարձակալությունից ստացված եկամուտներից հարկեր չի վճարել։ «Ըստ նախկին նախագահի պատճառաբանության, քանի որ նախորդ տարում չեն գերազանցել 58.3 միլիոն ՀՀ դրամ շրջանառության շեմը, տեղյակ չեն եղել, որ ԱԱՀ-ի վճարման պարտավորություն կրող են, ուստի «Հայաստանի նկարիչների միություն» ՀԿ-ի կողմից չի ներկայացվել ավելացված արժեքի հարկի հաշվարկ»,– նշված է կառավարության որոշման հիմնավորումներում։
Այս չկատարված պարտավորություններն, ի դեպ, ի հայտ են եկել հարկային ստուգման արդյունքում։ Եվ, քանի որ նկարիչների միության պարտքը ի հաշիվ տույժերի ու տուգանքների, շարունակում է աճել, կառավարությունն առաջարկում է մարել այս պահին առկա պարտքը` 18.5 միլիոն ՀՀ դրամը և ապահովել միության բնականոն աշխատանքը։
Հիշեցնենք` 2018թ–ի դեկտեմբերի 15-ին Հայաստանի նկարիչների միության նախագահ է ընտրվել Սուրեն Սաֆարյանը: Մինչ այդ 20 տարի շարունակ միությունը ղեկավարում էր Կարեն Աղամյանը։