ԵՐԵՎԱՆ, 29 մայիսի — Sputnik. ՀՀ երկրորդ նախագահ Ռոբերտ Քոչարյանի հետ համագործակցության հարցը «Բարգավաճ Հայաստան» կուսակցության օրակարգում չկա և չի քննարկվել։ Այսօր ԱԺ–ում լրագրողների հետ ճեպազրույցում այս մասին ասաց ԲՀԿ նախագահ, պատգամավոր Գագիկ Ծառուկյանը։
Կալանքից ազատվելուց հետո Ծառուկյանը Քոչարյանի հետ չի հանդիպել ու նույնիսկ հեռախոսով չի խոսել։ Իսկ կալանքից ազատվելը, Ծառուկյանի բնորոշմամբ, «կատարվել է օրենքի սահմանում։
Լրագրողների հիշեցմանը, որ Քոչարյանի անունը մշտապես կապվել է ԲՀԿ–ի հետ, ու նա աջակցել է Ծառուկյանի բիզնեսի բարգավաճմանը, Գագիկ Ծառուկյանն այսպես արձագանքեց. «Ինչ եք ասում, աղջիկ ջան, կարող է ձեր բարեկամներին է աջակցել։ Ինձ ոչ մեկը չի աջակցել, ես ոչ մեկի առաջ պարտավորություն չունեմ»։
Անդրադառնալով դատական համակարգում իրականացվող փոփոխություններին` Ծառուկյանը նշեց, որ ԲՀԿ–ն բազմիցս հայտարարել է, որ փոփոխություններն անհրաժեշտ են և պետք է իրականացվեն ըստ օրենքի ու Սահմանադրության։