ԵՐԵՎԱՆ, 28 մայիսի – Sputnik. Ռուսաստանի ամենափակ ռազմական օբյեկտներից մեկում` Պաշտպանության կառավարման ազգային կենտրոնում, երեկ` մայիսի 27-ին, կազմակերպված ցուցադրության ժամանակ մոդելները ներկայացրել են «Ռուսաստանի բանակի» և ռեփեր Տիմատիի համատեղ զինվորական ոճի հագուստը` կանանց, տղամարդկանց և երեխաների համար։
Տիմատին Հայաստանում նկարահանած տեսահոլովակից հետո որոշել է լիամետրաժ ֆիլմ նկարել
Ցուցադրությանը ներկա ՌԴ պաշտպանության նախարար Սերգեյ Շոյգուն Տիմատիից նվեր է ստացել Black Star ապրանքանիշի բանակային բաճկոն` կարված անհատական դիզայնով։
«Ինձ պատմեցին, թե ինչ է սիրում պաշտպանության նախարարը։ Նրա նախասիրությունների, համացանցում լուսանկարների հիման վրա մենք բաճկոն կարեցինք, որը դուր կգար հենց նրան։ Մեզ տվեցին ստույգ չափսերը, և ստեղծեցինք բացառիկ նմուշ», – ասել է Տիմատին։
«Զվեզդա» հեռուստաալիքի տվյալներով` գարնանային–ամառային հավաքածուի վրա աշխատել են մոտ կես տարի. ռեփ ոճ` «Ռուսաստանի բանակ» տարբերանշանով վերնազգեստում, ազատ տաբատներ` հավաքված կոճերի մոտ, oversize հուդիներ և նորաձև կոմբինեզոններ։ Աղջիկներին առաջարկում են սաֆարի զգեստներ, իսկ երիտասարդներին` երկար ամառային շորտեր ու շապիկներ` կրծքին և մեջքին «Սիրիա» գրությամբ։ Ամեն ինչ զինվորական համազգեստի գույներով է` ավանդական մուգ կանաչ, ավազագույն և սև։