ԵՐԵՎԱՆ, 27 մայիսի — Sputnik. Արքայազն Հարրիի և Մեգան Մարքլի նորածին որդին հասցրել է ծանոթանալ` միլիոնատեր Ալեքսիս Օհանյանի և հայտնի թենիսիտուհի Սերենա Ուիլյամսի դստեր` փոքրիկ Օլիմպիայի հետ։ Այս մասին գրում է The Daily Mail–ը։
Զարմանալի չէ, քանի որ Սերենա Ուիլյամսն ու Մեգան Մարքլը վաղեմի ընկերուհիներ են։ Ընդ որում` հրապարակման մեջ նշվում է, որ թագավորական զույգը ցույց է տալիս նորածնին միայն նեղ շրջանակի մարդկանց` մտերիմ ընկերներին և թագավորական ընտանիքի ներկայացուցիչներին։
Հանդիպումը տեղի է ունեցել անցած շաբաթ, երբ Ուիլյամսը պետք է մասնակցեր Roland Garros թենիսի մրցաշարին։
Հիշեցնենք, որ երեխան ծնվել է մայիսի 6–ին 3,3 կգ քաշով Լոնդոնի Պորտլենդ հիվանդանոցում։ Նրա լույս աշխարհ գալու մասին հայտարարել էին միայն օրվա երկրորդ կեսին։ Հայտարարել էր արքայազն Հարրին, իսկ Մեգան Մարքլը տեսախցիկների առաջ որդու հետ հայտնվեց միայն չորեքշաբթի` մայիսի 8-ին։
Երեխան բրիտանական գահի հերթում կզբաղեցնի 7-րդ տեղը` պապից (արքայազն Չարլզ), հորեղբորից (արքայազն Ուիլյամ), նրա երեխաներից (արքայազն Ջորջ, արքայադուստր Շարլոտա և արքայազն Լուի) և իր հորից (արքայազն Հարրի) հետո։
Հիշեցնենք` «Մեծ սաղավարտ» մրցաշարի 23-ակի հաղթող Սերենա Ուիլյամսն ու Ալեքսիսն ամուսնացել են 2017 թվականին։ Նույն տարվա սեպտեմբերին ծնվել է նրանց դուստրը` Օլիմպիան։