ԵՐԵՎԱՆ, 24 մայիսի — Sputnik. Լոնդոնի «Արսենալի» նախկին գլխավոր մարզիչ Արսեն Վենգերը մեկնաբանել է Եվրոպայի Լիգայի եզրափակիչը Ադրբեջանում անցկացնելու որոշումը։ Այս մասին լեգենդար մարզիչն ասել է The Telegraph–ին տված հարցազրույցում։
«Թիմերը խնդիրներ չեն ունենա։ Նրանք կատարյալ պայմաններում են ապրում, նրանք ունեն մասնավոր ինքնաթիռ, տեղեր բիզնես–դասում։ Երկրպագուների համար նման ճանապարհորդությունը իսկական մղձավանջ կլինի:
Հայտնի մարզիչը կարծում է, որ ժամանակակից աշխարհում չպետք է լինեն այնպիսի դեպքեր, որը պատահել է Մխիթարյանի հետ։
Վենգերը նշել է, որ չի պատրաստվում Բաքու մեկնել ու ցավակցել է երկրպագուներին, որոնք եզրափակչի տոմս են գնել, բայց չեն կարողանալ մեկնել։
Վենգերը թոշակի է անցել 2018 թվականին, երբ հեռացել է «Արսենալից» 22 տարի թիմի մարզիչը լինելուց հետո։ Մարզիչը «զինակոչների» հետ 17 մրցանակ է շահել, որոնց շարքում կան Անգլիայի չեմպիոնի երեք տիտղոս, նաև երկրի յոթ գավաթ ու Սուպեր գավաթ։
Ավելի վաղ լոնդոնյան «Արսենալը» քննադատել էր ՈւԵՖԱ–ին Եվրոպայի լիգայի եզրափակիչը Բաքվում անցկացնելու համար։ Մայիսի 21–ին ֆուտբոլային ակումբը հայտարարել էր, որ ակումբի կիսապաշտպան, Հայաստանի հավաքականի ավագ Հենրիխ Մխիթարյանը Բաքու չի մեկնի։ Զինագործները մտավախություն ունեն, որ Մխիթարյանը կարող է Ադրբեջան մուտք գործելու հետ կապված խնդիրներ ունենալ, քանի որ ՀՀ քաղաքացիներն ու այլ երկրների` հայկական ազգանուններ ունեցող քաղաքացիները նախկինում արդեն բախվել են նման դժվարությունների։ Մխիթարյանն արդեն երկու անգամ բաց է թողել Եվրոպայի գավաթի խաղերը ադրբեջանական թիմերի հետ։