ԵՐԵՒԱՆ, 24 մայիսի — Sputnik. Լոնտոնեան Արսենալի երկրպագուները թրոլինկի ենթարկած են ամերիկահայ հեռուստաաստղ Քիմ Քարտաշեանը:
Ամենայայտնի հայուհիին մեղադրած են, որ չէ պաշտպանած Արսենալի կիսապաշտպան Հենրիխ Մխիթարեանին: Երկրպագուներու կարծիքով` Քարտաշեան պէտք է ուղերձ յղէր ու աւելի լայն արձագանք տար Պաքուի հետ կապուած խայտառակութեան:
Նախապէս լոնտոնեան Արսենալը քննադատած էր Ուեֆա–ն Եւրոպայի լիկայի եզրափակիչը Պաքուի մէջ կազմակերպելու համար: Մայիս 21–ին ֆութպոլային ակումբը յայտարարած էր, որ ակումբի կիսապաշտպան, Հայաստանի հաւաքականի աւագ Հենրիխ Մխիթարեան Պաքու չի մեկնիր: Զինագործները մտավախութիւն ունին, որ Մխիթարեան կրնայ Ատրպէյճան մուտք գործելու հետ կապուած խնդիրներ ունենալ, քանի որ ՀՀ քաղաքացիներն ու այլ երկիրներու` հայկական ազգանուններ ունեցող քաղաքացիները անցեալին արդէն բախուած են նման դժուարութիւններու: Մխիթարեան արդէն երկու անգամ չէ խաղցած Եւրոպայի գաւաթի խաղերը ատրպէյճանական խումբերու հետ:
Երկրպագուները մեղադրած են հեռուստաաստը, որ Քարտաշեան կ’օգտագործէ իր հայկական ծագման թեման, երբ ձեռնտու է (օրինակ` յայտնի Շերի հետ հանդիպելու համար) կամ Ապրիլի 24–ին, երբ ան Ցեղասպանութեան մասին հրապարակումներ կ’ընէ:
Ոմանք նոյնիսկ առաջարկած են Քիմին օգտագործել ամուսինը` յայտնի ռեփեր Քանյէ Ուեսթն, որ իր հերթին կրնայ ուղղակիօրէն դիմել նախագահ Տոնալտ Թրամփին:
Twitter-ի վրայ հրապարակուած ամենածիծաղելի առաջարկը սա է. «Եկէք պահանջագիր ներկայացնենք, որ Քարտաշեաններու ամբողջ ընտանիքը մեկնի Պաքու, գնէ մնացած բոլոր տոմսերն ու երկրպագէ Հենրիխին: Թող բոլոր ցանկացողներուն ալ Հենոյի անունով շապիկներ բաժնեն»:
Քարտաշեան ընտանիքի ներկայացուցիչները դեռ չեն արձագանքած այս հարցին: