Ադրբեջանոտ վերնագրեր` Նիկոլ Փաշինյանի որդու մասին. ՊՆ–ն մեկնաբանել է տարածվող լուրը

ԵՐԵՎԱՆ, 24 մայիսի – Sputnik. Սոցիալական ցանցերում և ԶԼՄ–ներում տեղեկություն է տարածվել, թե ՀՀ վարչապետ Նիկոլ Փաշինյանի որդուն՝ Աշոտ Փաշինյանին, Արցախից տեղափոխել են Սովետաշեն։ ՀՀ ՊՆ մամուլի քարտուղար Արծրուն Հովհաննիսյանը Facebook սոցիալական ցանցում այս կապակցությամբ գրառում է արել` առանց որևէ մեկի անունը նշելու։

«Ադրբեջանոտ վերնագրերին չեմ անդրադառնա, ուղղակի ամոթ է։ ՀՀ ԶՈւ-երի ցանկացած զինծառայող տարբեր ժամանակներում, տարբեր վայրերում մասնակցում է տարբեր հավաքների, քննությունների ու զորավարժությունների»,– գրել է նա։

Փաշինյանի որդուն Արցախից տեղափոխելու մասին խոսակցություններին արձագանքել են նաև օգտատերերը։ Ոմանք ենթադրել են, որ հարևան երկրում շուտով ռազմական գործողություններ են լինելու, այդ պատճառով էլ «վարչապետն իր որդուն բերել է Հայաստան»։

Հիշեցնենք, որ Աշոտ Փաշինյանը բանակ էր զորակոչվել անցած տարվա հուլիսի 9-ին: Նա ծառայում է Արցախում։