ԵՐԵՎԱՆ, 23 մայիսի — Sputnik. Հայտնի լրագրող և հաղորդավար Վլադիմիր Պոզներն արդեն հանդիպել է վարչապետ Նիկոլ Փաշինյանի հետ։ Այդ մասին նա ասաց Երևանում իր «Հրաժեշտ պատրանքներին» գրքի շնորհանդեսի ժամանակ։
Վլադիմիր Պոզները երեկ` մայիսի 22–ին, ժամանել է Հայաստան։ Հինգշաբթի նա վարպետության դաս է անցկացրել Ռուս–հայկական համալսարանի և այլ բուհերի ուսանողների համար։ Մայիսի 24–ին Պոզները կդառնա ARARAT Speakers Night նախագծի հյուրը, կշփվի տարբեր ոլորտների ներկայացուցիչների հետ և կպատասխանի նրանց հետաքրքրող հարցերին։
«Վարչապետ Նիկոլ Փաշինյանի հետ հանդիպումը տևել է մեկուկես ժամ։ Դա ճաշ էր, այլ ոչ թե հարցազրույց», – պատասխանելով Sputnik Արմենիայի հարցին`ասաց Պոզները։
Նա խոստովանեց, որ ամաչում է, երբ իրեն անվանում են լեգենդար կամ մեծ։ Նա ուղղակի լավ է անում իր գործը և չի կարծում, որ դա արտառոց է։
«Երբ այսօր հանդիպում էի Փաշինյանի հետ, մտածում էի` վարչապետն անելիք չունի՞, ինչո՞ւ է հանդիպում լրագրողի հետ։ Ես մտածեցի, որ Փաշինյանը լրագրող է եղել, և եթե նրան այդ ժամանակ (երբ նա դեռ լրագրող էր` խմբ.) վարչապետն ընդուներ, նա կզարմանա՞ր», – ասաց Պոզները։
Նշենք, որ Վլադիմիր Պոզները «Հրաժեշտ պատրանքներին» գիրքն անգլերեն է գրել 1990 թվականին։ 12 շաբաթ շարունակ գիրքը եղել է «The New York Times» թերթի բեսթսելերների ցանկում։ Ավելի ուշ այն թարգմանվել է ռուսերեն։ Այսօր հասանելի է նաև գրքի հայերեն տարբերակը` հայտնի գրականագետ, թարգմանիչ և գրող Ֆելիքս Բախչինյանի թարգմանությամբ։