ԵՐԵՎԱՆ, 23 մայիսի – Sputnik. ՀՀ բնապահպանության փոխնախարար Այսեր Ղազարյանը պաշտոնից ազատման դիմում է ներկայացրել ՀՀ վարչապետ Նիկոլ Փաշինյանին` պատճառաբանելով, որ բնապահպանության ոլորտում ընթացող գործընթացները չեն համապատասխանում իր սկզբունքներին և գործելակերպին: Այս մասին նա հայտնել է Facebook սոցիալական ցանցի իր էջում։
Հանրապետական կուսակցությունը կասեցնելը պոզով–պոչո՞վ է լինում. Փաշինյան
«Մեծարգո պարոն վարչապետ, նկատի ունենալով այն, որ բնապահպանության ոլորտում ընթացող գործընթացները, այդ թվում իրականացվող և իրականացվելիք գործողություններն ու միջոցառումները չեն համապատասխանում իմ սկզբունքներին և գործելակերպին, այդ պարագայում ինձ վերապահված լիազորությունների արդյունավետ իրականացման ապահովումը դառնում է թերի կամ անհնար, հետևաբար գտնում եմ, որ բնապահպանության նախարարությունում իմ հետագա աշխատանքը նպատակահարմար չէ, ուստի խնդրում եմ ինձ ազատել զբաղեցրած պաշտոնից»,- գրել է նա իր դիմումում:
Ղազարյանը հրապարակել է դիմումը և ավելացրել, որ մերժում է կառավարման «նախկին» համակարգի իներցիաները։
«Վստահ եմ, որ սերն ու հանդուրժողականությունը չեն վերաբերվում հանցավոր ռեժիմից «ժառանգված» կառավարման համակարգին և նրան սպասարկող «բալաստին».... մի տեսակ ակտիվացել են!!! Հետգրություն: Տղեք, դուրս եկեք «իներցիոն տաշտից», մի տեսակ չեք նայվում...»,– գրել է փոխնախարարը։
Հիշեցնենք` Այսեր Ղազարյանը բնապահպանության փոխնախարար էր նշանակվել 2018 թվականի հունիսի 21-ին։
Նիկոլ Փաշինյանի հայտարարության հետքերով. ի՞նչ կտա մի քանի օր անց ուժի մեջ մտնող փաթեթը