ԵՐԵՎԱՆ, 21 մայիսի — Sputnik. ՀՀ փոխվարչապետ Տիգրան Ավինյանը Կիևում հանդիպում է ունեցել Ուկրաինայի նորընտիր նախագահ Վոլոդիմիր Զելենսկիի հետ: Այս մասին նա տեղեկացնում է Facebook-ի իր էջում:
«Շնորհավորելով նորընտիր նախագահին՝ վերջինիս եմ փոխանցել ՀՀ վարչապետ Նիկոլ Փաշինյանի ջերմ բարեմաղթանքները»,- գրել է Ավինյանը:
Նա տեղեկացնում է, որ զրույցի ընթացքում անդրադարձ է եղել հայ-ուկրաինական երկկողմ օրակարգի մի շարք հարցերի՝ միաժամանակ կարևորելով երկու երկրների միջև քաղաքական երկխոսության ակտիվացումը: Երկկողմ առևտրատնտեսական հարաբերությունների զարգացմանն ուղղված քայլերի համատեքստում, Տիգրան Ավինյանի տեղեկացմամբ, քննարկվել է հայ-ուկրաինական միջկառավարական հանձնաժողովի գործունեության վերսկսման հետ կապված հարցեր:
Տեղի է ունեցել մտքերի փոխանակում երկու երկրներում հանրային կառավարման ոլորտում իրականացվող բարեփոխումների վերաբերյալ:
Հիշեցնենք, որ փոխվարչապետ Ավինյանը Ուկրաինա էր մեկնել՝ մասնակցելու երկրի նախագահի երդմնակալության արարողությանը: