ԵՐԵՎԱՆ, 21 մայիսի – Sputnik. Քաղաքական գործիչները պետք է զերծ մնան այնպիսի գործողություններից և հայտարարություններից, որոնք կարող են ընկալվել որպես ճնշում դատական համակարգի վրա: Այս մասին հայտարարել են Եվրոպայի խորհրդի խորհրդարանական վեհաժողովում Հայաստանի հարցով համազեկուցողներ Յուլյա Լովոչկինան (Ուկրաինա) և Անդրեյ Շիրելը (Սլովենիա)։
Ըստ ԵԽԽՎ կայքում հրապարակված հաղորդագրության` այս հայտարարությունը հետևել է Հայաստանի վարչապետ Նիկոլ Փաշինյանի`դատարանների մուտքերն արգելափակելու կոչին։
«Առանց այդ որոշման հիմքերի վերաբերյալ որևէ գնահատականի, մենք ցանկանում ենք ընդգծել, որ դատական իշխանության անկախությունը օրենքի գերակայության նախապայմանն է, և հետևաբար օրենքի գերակայությունը լավագույնս պահպանվում է քաղաքական գործիչների կողմից որևէ միջամտության բացակայությամբ։ Կան հստակ իրավական ընթացակարգեր, ինչպիսին է օրինակ ավելի բարձր դատական ատյաններին հայցադիմումների ներկայացումը, դատական ատյանի այն որոշումները վիճարկելու համար, որոնք կարող են հարցեր առաջացնել։ Օրենքի գերակայության պահպանումը պահանջում է հարգանք ընթացակարգերի նկատմամբ, որպեսզի պաշտպանվեն բոլոր քաղաքացիները` անկախ նրանց ով լինելուց», - նշված է հայտարարության մեջ։
Միևնույն ժամանակ ԵԽԽՎ համազեկուցողները շեշտել են, որ դատական համակարգի բարեփոխումները շարունակում են առաջնահերթություն լինել, ուստի իրենք ողջունում են վարչապետ Նիկոլ Փաշինյանի՝ այդպիսի բարեփոխումներ անելու, կոռուպցիայի դեմ պայքարելու վերաբերյալ հայտարարությունը, ինչպես նաև այդ ամենը Եվրոպայի խորհրդի օգնությամբ իրականացնելու ցանկությունը:
Հիշեցնենք, որ երեկ վաղ առավոտից ցուցարարները փակել էին հանրապետության բոլոր դատարանի ելքերն ու մուտքերը` հետևելով Փաշինյանի կոչին։ Ացելի ուշ Փաշինյանը հանդես եկավ մեկ այլ հայտարարությամբ` հորդորելով բացել դատարանների մուտքերը։