ԵՐԵՎԱՆ, 20 մայիսի – Sputnik. ՀՅԴ–ն կարծում է, որ սիրո և համերաշխության կարգախոսի քողի տակ հանրության զգոնությունը թուլացնող և ամբոխավարության մղումներով ազգային պետական արժեքները ոտնահարող ուժերն անցել են թույլատրելի բոլոր սահմանները: Այս մասին նշված է ՀՅԴ Արցախի Կենտրոնական կոմիտեի հայտարարության մեջ։
«Վերջին օրերին ականատեսը եղանք ՀՀ-ում ստեղծված արհեստածին պայթունավտանգ իրավիճակի, որը փորձ է արվում տեղափոխել Արցախի քաղաքական դաշտ: Այդ ամենը միտված են զոհողություններով և արյամբ ձեռք բերված հայկական պետական համակարգը խաթարելու և հաղթանակների գրավական՝ համազգային համերաշխությունը սասանելու: ՀՅ Դաշնակցության դեմ վայրահաչոցներն ու ՀՅԴ Բյուրոյի բազմամյա ներկայացուցիչ, Արցախյան ազատամարտի օրերին առանցքային դեր ունեցող մարտական պատասխանատու Հրանտ Մարգարյանի և իր մանկահասակ թոռների նկատմամբ թույլ տրված տմարդի ոտնձգությունը՝ ստոր գործընթացների հետևանք են»,– նշել են դաշնակցականները:
Կուսակցությունը վստահեցնում է, որ Դաշնակցությունն անխոնջ պահակն է ազգային արժեքների. հայ ժողովիդի դարավոր իղձերի իրականացման ուղղությամբ համախմբման ռահվիրա կուսակցությունը ունակ է իր ավանդական մոտեցումներով ստանձնելու պատասխանատվություն, միասնություն ու հարգանք պարտադրելով բոլորին: Թող որ դա կասկածի առարկա չդառնա:
«Իսկ ինչ մնում է Մայր հայրենիքի իշխանություններին, կոչ ենք անում սթափվել եւ իրական պատասխանատվություն կրել: Անխոհեմ քայլերը վտանգում են բոլորիս անվտանգությունը: Հատվածական օրախնդիր մոտեցումերը, փորձերը, որով ցանկանում եք քողարկել անհաջողություններն ու ամբոխահաճո խոստումների ձախողումները՝ վաղ թե ուշ դատապարտված են բացահայտման: Իսկ պատմության եւ ժողովրդի առաջ պատասխանատվությունից խուսափելն անհնարին է»,– հայտարարել են դաշնակցականները:
ՀՅԴ–ն վստահ է, որ ամբոխավարության վրա հիմնված պատեհապաշտների հոխորտանքներն ու չկշռադատված քայլերը չեն կարող սասանել իրենց միասնականությունն ու շեղել սերունդների նկատմամբ պարտավորեցնող պատասխանատվությունից:
Հիշեցնենք, որ մայիսի 18-ին Ազատության հրապարակում ՀՀ երկրորդ նախագահ Ռոբերտ Քոչարյանին կալանքից ազատելու դատարանի որոշման դեմ բողոքող ցուցարարների և Հրանտ Մարգարյանի միջև միջադեպ էր տեղի ունեցել: Ակցիայի մասնակիցները, Ազատության հրապարակում թոռների հետ զբոսնող Հրանտ Մարգարյանին տեսնելով, սկսել էին վանկարկել «դավաճան», հետո փորձել էին մոտենալ նրան, քաշքշել:
Ոստիկաններին հաջողվել էր հանդարտեցնել ակցիայի մասնակիցներին: