ԵՐԵՎԱՆ, 19 մայիսի — Sputnik. Քիչ առաջ խոշոր ավտովթար է տեղի ունեցել Արմավիրի մարզում։
Արմավիր քաղաքի մոտակայքում գտնվող Արգավանդ գյուղի վարչական տարածքում իրար են բախվել «ԳԱԶ 66» բեռնատար ու թեթև մարդատար «Ժիգուլի» մակնիշի ավտոմեքենաներ։
«Ժիգուլու» վարորդը և ուղևորը մարմանական վնասվածքներ են ստացել ու տեղափոխվել Արմավիր բժշկական կենտրոն։
Մեր տեղեկություններով ուղևորը, որը երիտասարդ տղա է, հիվանդանոց է տեղափոխվել անգիտակից։ Նրա վիճակը գնահատվում է շատ ծանր, ուստի այս պահին պատրաստվում են երիտասարդին տեղափոխել Երևան։
Վարորդի գիտակցությունը տեղն է, չնայած նա ևս լուրջ վնասվածքներ է ստացել։ Բեռնատարի վարորդն էլ կրել է միայն նյութական վնաս։
Վթարի վայրում իրենց աշխատանքն են իրականացնում ճանապարհային ոստիկանության Արմավիրի մարզը սպասարկող ստորաբաժանման ծառայողներն ու հետաքննչական խումբը։