Արմենուհի Մխոյան. Sputnik Արմենիա
Այսուհետ Շիրակի մարզ այցելողները կարող են տեսնել ուրարտական սեպագիր արձանագրության գեղագիր արտատիպը, որ արված է ճապոնական թթենու թղթի վրա: Դա ճապոնացի հայտնի արվեստաբան, պրոֆեսոր Կունիտո Նագաոկայի աշխատանքն է: Նա ավելի քան 8 տարի է, ինչ տարբեր նախագծերով, այդ թվում՝ «Խաչքարերի» նախագծով այցելում է Հայաստան: Անցյալ տարի, օրինակ, ճապոնացի պրոֆեսորը Երևանին նվիրեց Էրեբունու հիմնադրման մասին Արգիշտի արքայի սեպագիր արձանագրության վայելչագիր արտապատկերը:
Իսկ այս անգամ Կունիտո Նագաոկան պատրաստել է նաև Մարմաշենի ուրարտական սեպագիր արձանագրության դրոշմատիպը:
Ճապոնացի հայտնի պրոֆեսորը դրոշմատիպը պատրաստում է թթենու դալար շիվերից ստացած բարակ, բայց ամուր թղթի վրա՝ ստվերաներկի միջոցով: Այդ գործընթացում թթենին «չի տուժում»՝ չի վնասվում: Ինչպես այս, այնպես էլ պրոֆեսոր Նագաոկայի մյուս բոլոր գործերը բացառապես ձեռքի աշխատանք են՝ ավանդական չինական Տակու-Հոն տեխնիկայի կիրառմամբ:
Մարմաշենի սեպագիրն ունի հետևյալ բովանդակությունը՝ «Խալդյան մեծությամբ Արգիշտին ասում է. գրավեցի Էրիախի երկիրը, գրավեցի Իրդանիու քաղաքը՝ մինչև Իշկիգուլու երկիրը»։
Պրոֆեսորը Մարմաշենի արձանագրության դրոշմատիպի 3 օրինակ է պատրաստել: Նմուշներից մեկը լրացրել է իր աշխատանքների հավաքածուն: Մյուսը պարոն Նագաոկան նվիրել Գյումրու «Գալերի 25» պատկերասրահին, որի հրավերով ապրիլին այցելել էր Շիրակի մարզկենտրոն: Իսկ երրորդ օրինակը, որպես մարզի ամենահին «անձնագիր», նա նվիրել է Շիրակի մարզպետին:
Կունիտո Նագաոկան դատարկաձեռն չէր եկել Գյումրի: Բացի Մարմաշենում արված դրոշմատիպից, նա «Գալերի 25»-ին է նվիրել ճապոնական շատ հին գեղագրության օրինակներ:
«Շատ թանկարժեք գիրք է՝ սաղմոսներ՝ ամբողջը ձեռագիր, որը պրոֆեսորն իր հավաքածուից նվիրել է մեզ: Պրոֆեսորը նվիրել է ևս մեկ գեղագիր՝ սադափապատ, հին մեդիտացիոն աղոթք. այդպես է արված, որպեսզի աղոթքի ընթացքում ընթերցողը չքնի»,-Sputnik Արմենիային ներկայացնելով պրոֆեսորից ստացած նվերները` նշեց «Գալերի 25»-ի հիմնադիր Ալեքսան Տեր-Մինասյանը: Նա վստահեցրեց, որ այդ նվերները ևս իրենց յուրահատուկ տեղն են գտել պատկերասրահի՝ գեղագրության (կալիգրաֆիա) նմուշների շարքում:
Պրոֆեսոր Նագաոկան երկար տարիներ դասավանդել է գեղարվեստի եվրոպական տարբեր ակադեմիաներում՝ որպես հրավիրյալ պրոֆեսոր: Ճապոնացի պրոֆեսորն այս ոճով ստեղծագործող ամենահայտնի արվեստագետներից մեկն է աշխարհում, և նրա աշխատանքները ցուցադրվում են տարբեր երկրների ավելի քան 60 թանգարաններում և պատկերասրահներում: Նագաոկան շուրջ 140 անհատական ցուցահանդես է ունեցել:
Այսօր, բացի Մարմաշենի սեպագիր արձանագրության դրոշմատիպից, Գյումրու «Գալերի 25» պատկերասրահում ցուցադրված են պրոֆեսոր Կունիտո Նագաոկայի և WERK-STATT N Gumi գրաֆիկ խմբի աշխատանքները՝ «Գրքարվեստը և գեղագրությունը Ճապոնիայում» խորագրով: Ցուցահանդեսը ներկայացնում է Ճապոնիայի ժամանակակից արվեստը, որն ստեղծվել է խմբի կողմից` հեռավոր Վադայամա քաղաքում: