ԵՐԵՎԱՆ, 17 մայիսի — Sputnik. ՀՀ Ճանապարհային ոստիկանությունը տեղեկացնում է, որ վաղը կսահմանափակվի Մյասնիկյան պողոտայի երթևեկությունը:
Հետիոտնային շարժի անվտանգության բարելավման նպատակով Երևան քաղաքի Մյասնիկյան պողոտա №27 հասցեի դիմացի հատվածում արհեստական անհարթության հետ համատեղմամբ հետիոտնային անցման կազմակերպման շինարարական աշխատանքների կատարման հետ կապված 2019 թվականի մայիսի 18-ին ժամը 04:00-ից մինչև 07:00-ն կդադարեցվի երթևեկությունը Մյասնիկյան պողոտայի իջնող՝ Նոր-Նորքից դեպի Հերացու փողոց ուղղության երթևեկելի մասում, իսկ Ժամը 07:00-ից մինչև 10:00-ն Մյասնիկյանի բարձրացող՝ Հերացու փողոցից դեպի Նոր Նորք ուղղության երթևեկելի մասում:
Վերոնշյալ արհեստական անհարթության հետ համատեղմամբ հետիոտնային անցումը կգործի ս.թ. մայիսի 18-ից:
Միաժամանակ՝ Մյասնիկյան պողոտայի նշված հատվածում տրանսպորտային միջոցների երթևեկության առավելագույն թույլատրելի արագությունը երկու ուղղություններով կսահմանվի 40կմ/ժ:
Հիշեցնենք՝ մայիսի 11-ին այս հատվածում ողբերգական դեպք էր գրանցվել. վրաերթի ենթարկված 70-ամյա ծերունին տեղում մահացել էր:
Մյասնիկյան պողոտայի բնակիչները փակել էին ճանապարհը և թույլ չեն տալիս, որ մեքենաները երթևեկեն: Նրանք նշում էին, որ բազմիցս դիմել են տեղական ինքնակառավարման մարմիններին և խնդրել, որ տարածքում վերգետնյա անցում կառուցեն, սակայն նրանց խնդրանքը չի կատարվել: