ԵՐԵՎԱՆ, 17 մայիսի — Sputnik. Երևանի պետական համալսարանի հիմնադրման 100–ամյակին նվիրված միջոցառումներին որևէ պաշտոնյա հրավիրված չէ, քանի որ դրանք ակադեմիական միջոցառումներ են։ Այս մասին Sputnik Արմենիայի հետ զրույցում հայտնեց ԵՊՀ մամուլի խոսնակ Գևորգ Էմին–Տերյանը` հերքելով մամուլում տարածված լուրերը, թե միջոցառումներին հրավիրվել են բոլոր պաշտոնյաները, բացի ՀՀ վարչապետ Նիկոլ Փաշինյանից։
«ԵՊՀ հիմնադրման 100–ամյակի առթիվ բազմաթիվ միջոցառումներ են նախատեսված, որոնք մեծ մասամբ ակադեմիական բնույթի են` գրքերի հրատարակում, գիտաժողովներ։ Իսկ ակադեմիական միջոցառումներին որևէ պաշտոնյայի բուհը չի հրավիրել, այսինքն` սուտ են լուրերը, որ բոլորին հրավիրել ենք, բացի Փաշինյանից»,–ասաց նա։
Հիշեցնենք, որ «Ժամանակ» օրաթերթն այսօր գրել էր, որ բուհի հիմնադրման 100–ամյակի շրջանակում կազմակերպվելու է հանդիսավոր միջոցառում, որին հրավիրատոմսեր են ուղարկվել բազմաթիվ հասարակական և քաղաքական գործիչների, այդ թվում՝ արտասահմանից: Ըստ թերթի` միակ մարդը, որը հրավիրված չի լինելու միջոցառմանը, վարչապետ Նիկոլ Փաշինյանն է:
ԵՊՀ մամուլի խոսնակն անդրադարձավ նաև բուհի հոբելյանի առթիվ տարվա ընթացքում կազմակերպվող միջոցառումներին` ասելով, որ այսօր ԵՊՀ–ի դիմաց տեղի կունենա «Լավագույն ուսանող» մրցանակաբաշխությունը։
Ինչ վերաբերում է ակադեմիական միջոցառումներին, ապա դրանք տեղի կունենան սեպտեմբերի 25-28–ը։ «Աշխարհի ավելի քան 50 համալսարաններից հյուրեր կունենանք։ Այդ օրերին Արամ Խաչատրյան համերգասրահում տեղի կունենա մեծ համերգ, ըստ երևույթին` ամենամեծ միջոցառումը դա է լինելու։ Սակայն ևս մեկ անգամ ասեմ` չկա որևէ մեծ միջոցառում, որի ժամանակ կհրավիրվեն բարձրաստիճան պաշտոնյաներ, քանի որ դրանք, ինչպես արդեն նշեցի, ակադեմիական միջոցառումներ են»,– ասաց Էմին–Տերյանը։
Հիշեցնենք, որ երեկ վաղ առավոտից Գյումրիում մեկնարկեցին Երևանի պետական համալսարանի 100-ամյակին նվիրված տոնական միջոցառումները, իսկ արդեն Երևանում՝ ԵՊՀ կենտրոնական մասնաշենքի բակում, միջոցառումները եզրափակվեցին տոնական համերգով: