ԵՐԵՎԱՆ, 14 մայիսի — Sputnik. Հայաստանն ու Չինաստանը, հայ և չինացի ժողովուրդները հնագույն քաղաքակրթություններ են։ Sputnik Արմենիայի թղթակիցը Չինաստանից հայտնում է, որ այսօր ՀՀ վարչապետ Նիկոլ Փաշինյանի հետ հանդիպման ժամանակ այս մասին ասել է Չինաստանի նախագահ Սի Ծինփինը։
ՀՀ վարչապետը, հաստատելով չինացի պաշտոնյանի այդ միտքը, իր կողմից շեշտել է, որ Հայաստանի ու Չինաստանի կապի մասին վկայություններ կան 5-րդ դարի հայկական ձեռագիր արձանագրություններում։
«Այդ կապերն ունեցել են առևտրային, հումանիտար ու քաղաքական նշանակություն, և մեզ համար այսօր էլ շատ կարևոր են Չինաստանի հետ կառուցողական ու արդյունավետ հարաբերությունները» ,– ասել է Փաշինյանը։
ՀՀ վարչապետը Չինաստանի նախագահին շնորհավորել է Չինաստանի Ժողովրդական Հանրապետության հիմնադրման և հեղափոխության 70-ամյակի, ինչպես նաև «Մեկ գոտի, մեկ ճանապարհ» նախաձեռնության հաջող մեկնարկի կապակցությամբ` նշելով, որ Հայաստանը մեծապես հետաքրքրված է այդ ծրագրով։
Հայաստանի վարչապետ Նիկոլ Փաշինյանն այսօր աշխատանքային այցով ժամանել է Պեկին։ Այցի ընթացքում նախատեսված է նաև Փաշինյանի հանդիպումը նաև ՉԺՀ վարչապետ Լի Կեցյանի։ Նախատեսվում է նաև ՀՀ վարչապետի ելույթը «Ասիական քաղաքակրթությունների երկխոսություն» համաժողովում։