ԵՐԵՎԱՆ, 14 մայիսի — Sputnik. Ռուսաստանի բնակիչ Զարուհի Զալինյանն ավելի քան 10 տարի փորձում է ապացուցել իր ռուսաստանյան քաղաքացիությունը։ Զալինյանի հարցը բարձրացրել է Russia Today տեղեկատվական գործակալությունը։
Զարուհին ծնվել է 1989 թվականին Կիրովականում (այժմ` Վանաձոր)։ 1992 թվականին նա ծնողների և քույրերի հետ տեղափոխվել է Մոսկվա։ Ինչ–որ ժամանակ ընտանիքն ապրել է բարեկամների մոտ, իսկ 5 տարի անց մեկնել է Սարատովի մարզի Արկադակ քաղաք։ Գրանցում ստանալուց հետո Զարուհու մայրը` Նունե Զալինյանը, դիմել է միգրացիայի վարչություն, որտեղ նրա խորհրդային անձնագրում ՌԴ քաղաքացիության մասին գրառում են ավելացրել։
2006 թվականին ՆԳՆ պաշտոնյաները վերցրել են Զարուհու, նրա քույրերի (քույրերն այն ժամանակ անչափահաս են եղել) և մոր ռուսական անձնագրերը։ Հետո Զալինյանների ընտանիքի բոլոր անդամներին վերադարձրել են անձնագրերը, բացի Զարուհու փաստաթղթից, թեև աղջիկը մանկուց ապրել է Ռուսաստանում և անձնագիրը ստացել է 14 տարեկանում։ Նա ստիպված է եղել կրկին դիմել ՌԴ քաղաքացիություն ստանալու համար։ Ճիշտ է` պարզեցված կարգով` որպես ռուսաց լեզվի կրող։
Զարուհու խոսքով` 90-ականներին, երբ մոր խորհրդային անձնագրում գրանցել են ՌԴ քաղաքացիությունը, իր տվյալները չեն մուտքագրել ՆԳՆ–ի անձնագրային բազայում։
Զարուհին դիմել է միգրացիոն մարմիններին` խնդրելով պարզեցված կարգով անձնագիր տրամադրել (որպես լեզվի կրող), սակայն մերժում է ստացել։ RT–ն հարցում է ուղղել ՌԴ ՆԳՆ–ին և դրական պատասխան ստացել. որպես լեզվի կրող` աղջիկը կարող է պարզեցված կարգով դիմել ՌԴ անձնագիր ստանալու համար։