Էներգետիկ անվտանգության ոլորտի փորձագետ Վահե Դավթյանը Sputnik Արմենիայի հետ զրույցում մեկնաբանել է գազի սակագնի նվազեցման վերաբերյալ վարչապետ Փաշինյանի հայտարարությունը։ Նիկոլ Փաշինյանն ՌԲԿ-ի հարցազրույցում ասել էր, որ ռուսական գազի գինը նվազեցնելու տեղ կա։ Ըստ Վահե Դավթյանի, վարչապետն ավելի շուտ նկատի է ունեցել նման հնարավորության հեռանկարը, քանի որ ներկայում գազի սակագինն իջեցնելու հնարավորություն չկա։
«Մինչև 2025 թվականը ԵԱՏՄ տարածքում որևէ ընդհանուր սակագնային քաղաքականության մասին խոսք լինել չի կարող»,-ասում է էներգետիկ անվտանգության ոլորտի փորձագետը։
Ըստ Դավթյանի, այն գործընթացները, որոնք այսօր տեղի են ունենում ԵԱՏՄ-ում, իրականում մեծ հույս չեն ներշնչում, որ 2025 թվականին կստեղծվի միասնական գնագոյացման սխեմա։
«Կարծում եմ այսօրվա դրությամբ շատ վաղ է խոսել միասնական շուկայի, առավել ևս՝ գազի գնի նվազեցման մասին»,-նշում է փորձագետը։
Դավթյանի կարծիքով, Հայաստանի մի փոքր իդեալիստական մոտեցումը եվրասիական ինտեգրացմանը, մասնավորապես ընդհանուր էներգետիկ շուկաների ձևավորմանը, այնքան էլ արդարացված չէ, և այդ հարցում պետք է մի փոքր ավելի պրագմատիկ դիրքերից հանդես գալ։
Ռուսաստանն ու Հայաստանը պատրաստվում են համաձայնեցնել մինչև 2030 թվականը Հայաստանի գազամատակարարման և գազիֆիկացման գլխավոր սխեմաները։ Ինչպես տեղեկացնում է ՌԻԱ Նովոստին, լրագրողներին այս մասին հայտնել է ՌԴ կառավարության աշխատակազմի ղեկավարի առաջին տեղակալ Սերգեյ Պրիխոդկոն։