ԵՐԵՎԱՆ, 13 մայիսի — Sputnik. Բրյուսելում այսօր կայացել է Հայաստանի և Ադրբեջանի արտաքին գործերի նախարարներ Զոհրաբ Մնացականյանի և Էլմար Մամեդյարովի կարճատև հանդիպումը:
Ինչպես Sputnik Արմենիային ասաց ՀՀ ԱԳՆ մամուլի խոսնակ Աննա Նաղդալյանը, հանդիպումը կայացել է Արևելյան գործընկերության 10-ամյակին նվիրված նախարարական հանդիպման շրջանակում։
«Հայկական և ադրբեջանական պատվիրակությունների պաշտոնական բանակցություններ ծրագրված չեն, բայց կայացավ կարճ հանդիպում գագաթնաժողովի շրջանակում: Նախարարները միմյանց ձեռք սեղմեցին»,- ասաց Աննա Նաղդալյանը:
Հիշեցնենք, որ մի քանի ժամից Բրյուսել կժամանի նաև ՀՀ վարչապետ Նիկոլ Փաշինյանը։ Վարչապետը կմասնակցի Արևելյան գործընկերության տասնամյակին նվիրված պաշտոնական ընթրիքին, որը կտրվի Եվրոպական խորհրդի նախագահ Դոնալդ Տուսկի անունից:
Հիշեցնենք նաև, որ Նիկոլ Փաշինյանը`տիկնոջ՝ Աննա Հակոբյանի հետ մայիսի 12-13-ին աշխատանքային այցով մեկնել է Լյուքսեմբուրգի Մեծ Դքսություն և Բրյուսել։
Վարչապետի պատվիրակության կազմում են ՀՀ արտաքին գործերի նախարար Զոհրաբ Մնացականյանը, վարչապետի գլխավոր խորհրդական Արսեն Գասպարյանը, վարչապետի օգնական Հրաչյա Թաշչյանը։