ԵՐԵՎԱՆ, 13 մայիսի – Sputnik. ՀՀ առողջապահության նախարար Արսեն Թորոսյանը չի բացառում, որ առողջապահության ոլորտում կոռուպցիա կա: Այսօր լրագրողների հետ հանդիպման ժամանակ այս մասին ասաց Թորոսյանը՝ ամփոփելով իր պաշտոնավարման մեկ տարին:
«Կոռուպցիա ասելով ես նկատի ունեմ ապօրինի եկամուտների մասին, այսինքն՝ երբ բժիշկը պացիենտից ինչ-որ բան է հայցում: Սակայն ես վստահ եմ, որ ոչ մի բժիշկ հաճույք չի ստանում, երբ իր գրպանը հինգ հազար դրամ են դնում. այս երևույթի վերացման համար նախ պետք է նրանց աշխատավարձը բարձրացնենք: Առաջնային օղակի 10 000 բուժաշխատողների աշխատավարձն արդեն իսկ բարձրացվել է շուրջ երեսուն տոկոսով»,-ասաց նախարարը:
Ինչ վերաբերում է առողջապահության ոլորտի վերին օղակներում կոռուպցիայի դեպքերին, ապա Թորոսյանի` նախարարությունն ամեն ինչ անում է, որ դա բացառի:
Նրա խոսքով՝ կոռուպցիայի դեմ պայքարը կանխարգելում և պատժում է ենթադրում, սակայն իրենք նաև փորձում են համակարգում այնպիսի քայլեր անել, որ կոռուպցիայի սողոսկման համար այլևս որևէ տեղ չմնա: