ԵՐԵՎԱՆ, 9 մայիսի — Sputnik. Երևանում ընթանում է «Անմահ գնդի» երթը։ Այս տարի ավելի շատ մարդ է մասնակցում, քան երբևէ։
Երթը սկսվել է Ազատության հրապարակից. մարդիկ Հայրենական մեծ պատերազմի, ինչպես նաև արցախյան պատերազմի մասնակիցների դիմանկարները ձեռքերին քայլում են Երևանի գլխավոր պողոտայով։ Երթին մասնակցում են բազմաթիվ երևանցիներ, մարզերի բնակիչներ, ինչպես նաև հյուրեր Ռուսաստանից, Ղազախստանից և այլ երկրներից։ Երթին մասնակցում է նաև Հայաստանի Հանրապետության նախագահ Արմեն Սարգսյանը, որն իր ձեռքում պահել է լեգենդար հետախույզ Գևորգ Վարդանյանի (Ամիր) դիմանկարը։
Երթը գլխավորում է բանակային բաց «ՈՒԱԶ»–ների շարասյունը։ Ռազմական վարորդները դրանցով տանում են երթի գլխավոր հերոսներին` պատերազմի վետերաններին։
Մեքենաների կողքով քայլում է Երևանի կայազորի զինվորական նվագախումբը։ Նրանց հետևից գնում են հազարավոր մարդիկ։ Նրանց ուղեկցում են բայկերները։
Ակցիայի մասնակիցները անցան Մաշտոցի պողոտայով, Ամիրյան փողոցով, Հանրապետության հրապարակով, Վազգեն Սարգսյան փողոցով և իջան Կիրովի զբոսայգի, որտեղ ծաղիկներ խոնարհեցին խորհրդային օդաչու Նելսոն Ստեփանյանի հուշարձանի մոտ։
Հայաստանում «Անմահ գունդ» երթը տեղի է ունենում արդեն չորրորդ անգամ։ Միջոցառումն այս անգամ կրում է համազգային բնույթ. այն տեղի է ունենում Հայաստանի հինգ քաղաքներում` Գյումրիում, Վանաձորում, Կապանում և Իջևանում։