ԵՐԵՎԱՆ, 8 մայիսի — Sputnik. Պաշտպանի աջակցությամբ «Սանիթեքը» փոխանցել է քաղաքացիներին չվճարված գումարները: Այս մասին տեղեկանում ենք ՀՀ մարդու իրավունքների պաշտպանի պաշտոնական կայքից։
«Սանիթեք» ընկերության հայաստանյան մասնաճյուղի մի շարք աշխատակիցներ դիմել են Մարդու իրավունքների պաշտպանին` իրենց հասանելիք գումարները ստանալու նպատակով։
«Դիմումների ուսումնասիրությունից պարզ է դարձել, որ ընկերությունը մեկ քաղաքացու դեպքում չի տրամադրել նրա ամենամյա արձակուրդային վճարը, երեք այլ քաղաքացու դեպքում՝ նրանց ժամանակավոր անաշխատունակության նպաստը։ Իսկ, ահա, երկու այլ քաղաքացու դեպքում էլ ընկերությունն արձակուրդային վճարը և վերջնահաշվարկը չի վճարել»,–նշված է ՄԻՊ–ի հաղորդագրության մեջ։
Թեմայի վերաբերյալ պարզաբանումներ ստանալու նպատակով՝ ՄԻՊ–ը գրություններ է հասցեագրվել Երևանի քաղաքապետարան։ Մարդու իրավունքների պաշտպանին տրամադրվել է տեղեկություն, որ «Սանիթեք» ընկերության հայաստանյան մասնաճյուղը վճարել է քաղաքացիների հասանելիք գումարները։