Փաշինյանը թվարկեց քրեական գործերով անցնող պաշտոնյաներին

ԵՐԵՎԱՆ, 8 մայիսի — Sputnik. 2018-19թթ–ին Հայաստանում քրեական գործերով որպես մեղադրյալ են ներգրավել ՀՀ պաշտոնաթող նախագահը, նախկին փոխվարչապետը, պաշտոնաթող պաշտպանության նախարարը, ԳՇ նախկին պետը, նախկին բնապահպանության նախարարը, ԴԱՀԿ նախկին պետը, 2 գործող փոխնախարար, ՊՎԾ պետը և բարձրաստիճան այլ նախկին ու ներկա պաշտոնյաներ։ Այս մասին այսօր տարեկան ամփոփիչ ասուլիսում հայտարարեց ՀՀ վարչապետ Նիկոլ Փաշինյանը։

«Ես սա չեմ ասում որևէ մեկի անմեղության կանխավարկածը խախտելով, այլ ուղղակի որպես աննախադեպ վիճակագրական փաստ»,– ասաց Փաշինյանը։

Վարչապետը նաև հիշեցրեց, որ ինքն անձամբ է ներկայացել դատարան` որպես վկա, ինչն աննախադեպ երևույթ է։

Ինչ վերաբերում է 2018թ.–ից ի վեր բացահայտված կոռուպցիոն հանցագործությունների դեպքերին, Փաշինյանը նշեց, որ հարուցվել է 1446 քրգործ, որոնցով պետությանը հասցված վնասը կազմել է 89.3 մլրդ դրամ։ Այդ գումարից 32 մլրդ–ն արդեն վերականգնվել է, իսկ շուրջ 7.1 մլրդ դրամի չափով առկա է ունեցվածքի վրա դրված կալանք։

2018թ.–ին կոռուպցիոն հանցագործությունների փաստով հարուցված քրեական գործերը 2017–ի նույն ցուցանիշն աճել է 691-ով, կամ ավելի քան 100 տոկոսով։