ԵՐԵՎԱՆ, 7 մայիսի — Sputnik, Նանա Մարտիրոսյան. Արցախի Հանրապետության նախկին և գործող նախագահներ Արկադի Ղուկասյանի և Բակո Սահակյանի նամակը` ուղղված Հայաստանի գլխավոր դատախազին, որում կոչ է արվում փոխել Հայաստանի նախկին նախագահ Ռոբերտ Քոչարյանի նկատմամբ խափանման միջոցը, չի կարող բացասաբար անդրադառնալ Երևանի և Ստեփանակերտի քաղաքական վերնախավերի հարաբերությունների վրա։ Այդ մասին Sputnik Արմենիայի թղթակցի հետ զրույցում ասաց քաղաքագետ Արմեն Բաղդասարյանը։
Ուղերձի հեղինակները նշել են, որ ամեն տարի մայիսի 9-ին Արցախում հանդիսավորությամբ նշվում է եռատոնը՝ Հաղթանակի տոնը, Արցախի Հանրապետության պաշտպանության բանակի և Շուշիի ազատագրման օրը։ Ավանդույթի համաձայն՝ Ստեփանակերտում և Շուշիում անցկացվող տոնակատարությունների հյուր են լինում Արցախի Հանրապետության բոլոր նախկին ղեկավարները, մարդիկ, ովքեր իրենց հսկայական ավանդն են ներդրել Արցախյան պատերազմում, կանգնած են եղել մեր պետության և բանակի ստեղծման ակունքներում, մասնակցել են Շուշիի ազատագրմանը, կերտել են մեր Հաղթանակը։
«Հաշվի առնելով, որ Արցախի Հանրապետության առաջին նախագահ Ռոբերտ Քոչարյանը կալանավորված է, խնդրում ենք Ձեզ մայիսի 9-ին ընդառաջ կայացնել համապատասխան որոշում նրա խափանման միջոցը փոխելու մասին»,– ասվում է ուղերձում։
Գլխավոր դատախազությունում նշել են, որ չեն քննելու ուղերձը, քանի որ դա դուրս է իրենց իրավասության շրջանակից, իսկ գործը քննում է Երևանի ընդհանուր իրավասության դատարանը։
«Այդ փոխհարաբերությունները կշարունակեն ջերմ մնալ, դրան այլընտրանք չկա։ Նույնիսկ մղձավանջային երազում դժվար է պատկերացնել, որ կարող են ինչ–որ բախումներ լինել Հայաստանի ու Արցախի իշխանությունների միջև», – ասաց քաղաքագետը։
Բաղդասարյանն Արցախի նախագահների խնդրանքը դիտարկում է երկու հարթություններում` զգացմունքային և իրավական։ Առաջին դեպքում ցանկալի կլիներ, որպեսզի Հաղթանակի օրվա և Շուշիի ազատագրման տոնակատարության նախօրեին Արցախի Հանրապետության բոլոր երեք ղեկավարները ներկա լինեն միջոցառումներին, սակայն իրավական տեսանկյունից դա քիչ հավանական է` հաշվի առնելով Քոչարյանին առաջադրված մեղադրանքները։
Միաժամանակ, քաղաքագետը նշեց, որ տոնակատարություններից մասնակցելու են Հայաստանի երրորդ նախագահ Սերժ Սարգսյանը և վարչապետ Նիկոլ Փաշինյանը։ Այսպիսով, արցախյան վերնախավը փորձում է մի քիչ հարթեցնել երկրի ներկա և նախկին իշխանությունների միջև առկա տարաձայնությունները։
«Արցախի շուրջ ստեղծված իրավիճակն այնպիսին է, որ իշխանություններն ավելի սուր են զգում համախմբման անհրաժեշտությունը, և պառակտման ցանկացած, նույնիսկ տեսական վտանգ ավելի ցավագին է ընդունվում», – կարծում է փորձագետը։
Իր հերթին քաղաքապետ Երվանդ Բոզոյանն ասաց, որ Արցախի իշխանությունները փորձել են հանդես գալ խաղաղարարի դերում Հայաստանի նախկին և գործող իշխանությունների միջև։ Նա դա բացատրեց նրանով, որ Հայաստանում ցանկացած պառակտում բացասաբար է անդրադառնում Արցախի անվտանգության հարցերի վրա։ Փորձագետը համոզված է, որ Արցախի իշխանությունները միշտ ավելի պատասխանատու են վերաբերվել այդ հարցին և փորձել են սթափեցնել Հայաստանի գործընկերներին։ Նույնը տեղի է ունենում նաև Քոչարյանի դեպքում, կարծում է Բոզոյանը։
«Արցախի երկու նախագահների նամակը խաղաղության կոչ է, դրա մեջ ինչ–որ բացասական բան գտնելու համար պետք է հիվանդ երևակայություն ունենալ։ Հայաստանի իշխանությունները պետք է հասկանան, որ հասարակությունում պառակտումը ոչ մի լավ բանի չի հանգեցնի և համապատասխան հետևություններ անեն», – նշեց նա։
Միաժամանակ, քաղաքագետն ընդգծեց, որ Արցախի Հանրապետության ղեկավարների կոչը, չնայած հասցեատիրոջը, ուղղված է եղել առաջին հերթին Նիկոլ Փաշինյանին։