ԵՐԵՎԱՆ, 5 մայիսի — Sputnik, Կարինե Հարությունյան. Մոսկովյան 5 հասցեում գտնվող շենքի 2-րդ և 3–րդ հարկերը, չնայած խոստումներին, Մնջախաղի պետական թատրոնին չի տրամադրվի։ Sputnik Արմենիայի հետ զրույցում լուրը հաստատեց մշակույթի նախարարի պարտականությունները կատարող Նազենի Ղարիբյանը։
Հարցն այն է, որ շենքն ամրակցված է Պաշտպանության նախարարությանը, որը հրաժարվել է շենքի փոխանակման գնալ ու այն տրամադրել թատրոնին։
«Նախկին իշխանությունները Ժիրայր Դադասյանին վատ նվեր են արել` նրան հանձնելով տարածք (Գևորգ Քոչար 21 հասցեում), որը, պարզվեց, թատրոն դառնալ չի կարող։ Այդ շենքի մի մասը հուշարձան է համարվում և արտաքին միջամտության չպետք է ենթարկվի, ինչը նախատեսված է թատրոնի կառուցման նախագծով։ Այդ իսկ պատճառով էլ մենք որոշեցինք այն փոխանակել մեկ այլ շենքի հետ, որը դեռ չի ստացվում»,–ասաց Ղարիբյանը։
Նրա խոսքով` մշակույթի նախարարության ենթակա ազատ տարածքներում չկա որևէ տարածք, որը հարմար կլինի թատրոնի համար։ Դրա համար էլ իրենք մեկ այլ ազատվող տարածք են սկսել փնտրել ու գտել են Մոսկովյան 5–ը` նախկին զինկոմիսարիատի շենքը։
Վերոհիշյալ տարածքի համար իր գոհունակությունն էր հայտնել նաև Մնջախաղի թատրոնի տնօրեն Ժիրայր Դադասյանը։ Պաշտպանության նախարարությունը, սակայն, բացասական պատասխան է տվել շենքերի փոխանակման` մշակույթի նախարարության հարցմանը։
«Մենք հիմա նոր տարածք ենք փնտրում, քանի որ թատրոնի կառուցման նպատակով այս տարվա համար արդեն իսկ պետբյուջեով տրամադրված նորոգման գումարը կա (42 մլն դրամ)։ Մեր գործերի կառավարչին կրկին հորդորել եմ չորս աչքով տարածք փնտրել, որպեսզի հնարավորինս շուտ սկսվեն թատրոնի կառուցման աշխատանքները»,–ասաց Ղարիբյանը։
Ի դեպ, Sputnik Արմենիան նամակով դիմել էր ռազմական գերատեսչությանը` տեղեկանալու, թե ինչո՞ւ է շենքի օտարման կամ այն թատրոնին չտրամադրելու գործընթացն այդքան ձգձգվում և ի՞նչ դիրքորոշում ունի ՊՆ–ն։ Ի պատասխան մեզ հայտնել են, որ իրենց դիրքորոշումն արդեն գրությամբ ներկայացվել է ՀՀ վարչապետի աշխատակազմին։ «Իսկ գործընթացի տևողությունը պայմանավորված է եղել խնդրի բազմակողմանի ուսումնասիրության անհրաժեշտությամբ»,–նշված է պատասխանում։
Մնջախաղի թատրոնից էլ տեղեկացրին, որ շենքի խնդրի լուծման համար նամակով դիմել են «Իմ քայլը» խմբակցության ղեկավար Լիլիթ Մակունցին, քանի որ հենց նա էր խոստացել Մոսկովյան 5–ը տրամադրել թատրոնին ու շենքի խնդիրը լուծել։
Այս տարի նոր շենքում և, վերջապես, սեփական տանիքի տակ թատրոնի հիմնադրման 45-ամյակը նշել պատրաստվող թատրոնը, փաստորեն, կրկին մնացել է առանց տանիքի։
Նշենք, որ Մնջախաղի թատրոնն այժմ գործում է Պատանի հանդիսատեսի թատրոնի շենքում, և նրանց շաբաթվա ընթացքում միայն մեկ օր են բեմ տրամադրում։