ԵՐԵՎԱՆ, 4 մայիսի — Sputnik. Ռեալիթի շոուի ամերիկահայ աստղ Քիմ Քարդաշյանի մեկ գովազդային գրառումը Instagram-ում գնահատվում է մեկ միլիոն դոլար, գրում է TMZ պարբերականը։
«Ոլորտի աղբյուրը հաղորդում է, որ Քիմը մեկ միլիոն դոլար է ստանում Instagram-ում հրապարակման համար», - նշված է հաղորդագրությունում։
Պարբերականը հայտնում է, որ Քիմը դատական գործընթացի մեջ է ներքաշված Missguided USA հագուստի ապրանքանիշի դեմ։ Նա պնդում է, որ ընկերությունն օգտագործել է իր պատկերը՝ ապրանքները վաճառելու համար։
Ընկերությունը չի պատասխանել Քարդաշյանի պահանջներին, և հիմա Քիմը պատրաստվում է դատական կարգով նրանից պահանջել հինգ միլիոն դոլար։
Միաժամանակ փաստաթղթերում, որոնք Քիմը ներկայացրել է Missguided ապրանքանիշի դեմ հայցի հետ, տեղեկություն կա այն մասին, որ աստղը 300 000-500 000 դոլար է ստանում Instagram-ում մեկ գրառման համար։ Պարբերականը նշում է, որ թվերը կարող են ավելի բարձր լինել։
Քարդաշյանը պնդում է, որ հաճախ մերժում է նման առաջարկները, որովհետև չի ուզում կապված լինել ինչ-որ ապրանքանիշների հետ։
Քարդաշյանը մոտ 136 միլիոն բաժանորդ ունի Instagram-ում։